सुन तस्करीको अपरेसनमा खटिएका एक प्रहरी जवानको कोठाबाट थप एक किलो सुन जस्तो देखिने पहेँलो धातु बरामद भएको छ । बरामद धातु सुन हो वा सुन जस्तो देखिने धातु मात्र भन्ने परीक्षण हुन बाँकी छ ।
दरबारमार्ग प्रहरीका तत्कालीन डिएसपी रञ्जन दाहाललाई गलत सूचना दिएको अभियोग लागेका सादा पोसाकका प्रहरी जवान प्रसन्न श्रेष्ठको कोठामा छापा मार्दा सुन जस्तो देखिने धातु बरामद भएको प्रहरी उच्च स्रोतले बताएको छ ।
प्रहरीले मङ्गलवार कमलादीबाट १५ किलो सुन जस्तो देखिने पहेँलो धातु बरामद गरेको थियो । तर, परीक्षणका क्रममा साढे १४ किलो धातु चाँदी भएको पुष्टि भएको भनिएको थियो ।
साढे १४ किलो चाँदी र आधा किलो सुन प्रकरणको अनुसन्धानका क्रममा थप एक किलो धातु बरामद भएको हो । प्रहरी जवान बहादुरसिंह कडायत र प्रसन्न श्रेष्ठले आफ्नो वृत्तका डिएसपीलाई नै गुमराहमा राखेको पाइएको एसएसपी शुशीलकुमार यादव नेतृत्वको छानबिन समितिले जनाएको छ ।
सुन प्रकरणमा दरबारमार्ग प्रहरी प्रमुख डिएसपी रञ्जनकुमार दाहालको अपरेशनल नेतृत्व कमजोर देखिएको भन्दै उनलाई जिम्मेवारीबाट हटाइएको छ ।
