काठमाडौं । कोरोना भाइरस (कोभिड-१९) संक्रमणबाट यस साता विदेशमा थप तीन नेपालीको मृत्यु भएको छ ।
गैरआवासीय नेपाली संघ (एनआरएनए) अन्तर्गतको स्वास्थ्य समितिका अनुसार पछिल्लोपटक कोरोना संक्रमणका कारण यूएईमा दुई जना र बेलायतमा एक नेपालीको मृत्यु भएको हो ।
१९५ जनाको मृत्यु
यसैबीच, शनिबार साँझसम्मको तथ्यांकअनुार १६ देशमा गरी कोरोना संक्रमणबाट मृत्यु हुने गैरआवासीय नेपालीको संख्या १९५ पुगेको छ ।
साउथ अफ्रिका, पोर्चुगल, स्पेन, कतार साउदी अरबलगायत देशमा (नेपालीमा) कोरोना संक्रमण हुने क्रम केही बढेको स्वास्थ्य समितिका संयोजक डा. सञ्जीव सापकोटाले बताए ।
दोस्रो लहर सुरु
अस्ट्रेलिया र युरोपका केही देशमा कोरोना महामारीको दोस्रो लहर सुरु भएपछि नेपाली समुदायमा समेत कोरोना संक्रमण सामान्य रूपमा बढेको बताइएको छ ।
३८ देशमा संक्रमित
हालसम्म विश्वका ३८ देशमा रहेका नेपाली कोरोना भाइरसबाट संक्रमित भएको रकर्ड छ ।
हालसम्म ती देशमा बसोबास गर्ने ३४ हजार ७०१ नेपालीमा कोरोना संक्रमण देखिएको छ । तीमध्ये ३२ हजार ५११ जना भने कोरोना संक्रमणमुक्त भइसकेका छन् ।
सावधानी अपनाउन आग्रह
स्वास्थ्य समितिले कोरोना भाइरस संक्रमणको जोखिम कम भइनसकेकाले थप सचेत र सावधानी अपनाउन नेपाली समुदायलाई आग्रह गरेको छ ।