लन्डन । कोरोना भाइरसको संक्रमणबाट बेलायतमा मृत्यु हुने नेपालीहरुको संख्या अहिलेसम्म ३३ जना पुगेको लन्डनस्थित नेपाली दूतावासले जनाएको छ ।
साथै, बेलायतमा ४० जनामा कोरोना संक्रमितका विरामी पुष्टि भएको नेपाली दूतावास लन्डनका उपनियोग प्रमुख शरदराज आरनले जानकारी दिए । मृत्यु हुनेहरुमा करिब दुई दर्जन भूपू गोर्खाहरु रहेका छन् ।
कोरोनाबाट मृत्यु हुनेमा तीन जना महिला रहेका छन् । नेपालीहरुले आफ्नो वास्तविक अवस्थाबारे जानकारी दिन नचाहने भएकोले कोराेना संक्रमितको संख्या अझ बढी हुनसक्ने अनुमान छ ।
बेलायतमा अहिलेसम्म कोरोना संक्रमणका कारण ज्यान गुमाउनेको संख्या २० हजार ३ सय १९ पुगेको छ । बेलायतमा १ लाख ४८ हजार ३ सय ७७ जनामा कोरोना पोजिटिभ देखिएको छ ।
