काठमाडौं । नेपाली कांग्रेसका केन्द्रीय सदस्य डा. शेखर कोइरालाले नियमित अधिवेशनमा जानुको विकल्प नभएको बताएका छन् ।
नेपाली कांग्रेसको संस्थापन इतर समूहकै नेताहरुले विशेष महाधिवेशन माग गरिरहेका बेला डा. कोइरालाले नियमित अधिवेशनमा जानुको विकल्प नभएको बताएका हुन् ।
सभापति शेरबहादुर देउवाको निवास बूढानीलकण्ठमा जारी केन्द्रीय कार्यसमिति बैठकमा उनले पार्टीको विधान र संविधानले दिएको समय गुज्रिसकेकाले नियमित अधिवेशनमा जानुको विकल्प नभएको बताए ।
उनले विशेष महाधिवेशन र म्याद थप्ने कुरा कदापि मान्य नहुने उनको भनाइ छ ।
‘अहिले केही पदाधिकारी एवं जिम्मेवार नेताहरूबाट विशेष महाधिवेशन अथवा यही कार्यसमितिलाई डेढ दुई वर्ष समय थप्ने कुरा सुनिँदैछ, कोही केन्द्रीय सदस्यले यस्तो कुरा गरेका छैनन्,’ उनले भने, ‘पार्टीको विधान र संविधानले दिएको समय गुज्रिसकेकाले नियमित अधिवेशनमा जानुको विकल्प छैन । विशेष महाधिवेशन र म्याद थप्ने कुरा कदापि मान्य हुँदैन ।’
कोइरालाले क्रियाशील सदस्यताको समस्या समाधान नभई महाधिवेशन हुन नसक्ने समेत बताएका छन् । क्रियाशील सदस्यताको समस्या समाधान गरेर दुई महिनाभित्र महाधिवेशन गर्नुपर्नेमा उनले जोड दिए ।
उनले भने, ‘पटक-पटक हामीले कार्यतालिका बनायौं तर क्रियाशीलको विवादले कार्यतालिका प्रभावित भयो, यो पटक त्यस्तो नहोस् । छिटोभन्दा छिटो क्रियाशील सदस्यताको समस्या टुङ्ग्याएर डेढ-दुई महिनाभित्र महाधिवेशन सम्पन्न गरिनुपर्छ ।’