काठमाडौं । पछिल्लो क्रममा विवादित बन्दै गएर फुटको संघारमा पुगेको पार्टी नेकपा (एमाले) लाई मिलाउन उक्त पार्टीकै नेता वामदेव गौतमले कम्मर कसेका छन् ।
पार्टी नेता तथा एकता अभियानका संयोजकसमेत रहेका गौतमले पार्टीभित्र देखिएको समस्या समाधान गर्न पार्टी अध्यक्ष तथा वर्तमान प्रधानमन्त्री केपी शर्मा ओली र नेता नेपालसँग छलफल गर्न लागेका हुन् ।
उक्त अभियानको शनिबार बसेको बैठकले पार्टी भित्रको समस्या समाधान गर्न अभियान सक्रिय हुने निर्णय भएको उनको सचिवालयले जनाएको छ ।
अध्यक्ष ओलीको नेतृत्वमा शुक्रबार बालुवाटारमा बसेको केन्द्रीय कमिटी बैठकले विभिन्न निर्णय गरेपछि नेपाल पक्षका नेताहरु असन्तुष्ट भएकाबेला अभियानका संयोजक गौतमले आफ्नो सक्रियता बढाएका हुन् ।
नेता गौतमले अध्यक्ष ओली र नेता नेपालसँग छुट्टाछुट्टै वार्ता गर्ने तयारी भएको बताइएको छ । शुक्रबारको बालुवाटार बैठकको निर्णयपछि नेता नेपाल पक्षले शनिबार पार्टीभित्र समानान्तर कमिटी गठन गर्ने निर्णय गरेको छ ।
