काठमाडौं । कांग्रेस सभापति शेरबहादुर देउवाले पुनः केन्द्रीय विभाग गठन गरेका छन् । उनले पार्टीभित्र विरोध हुँदाहुँदै पनि उनले सात केन्द्रीय सदस्य थप गरेका हुन् ।
जसअनुसार एनपी साउँदलाई शुभेच्छुक संस्था समन्वय विभागको जिम्मेवारी दिइएको छ भने अम्बिका बस्नेतलाई वन, वातावरण तथा विपद् व्यवस्थापन विभागको जिम्मेवारी दिइएको छ । यसअघि शनिबार देउवाले विभिन्न १३ वटा विभाग गठन गरेका थिए ।
पौडेल समूहले महाधिवेशनको मिति सार्वजनिक भएसँगै आचारसंहिता लागेको भन्दै विभाग गठन भए कानुनतः खारेज हुनुपर्ने बताएको छ ।
काँग्रेसले आगामी फागुन ७ देखि १० गतेसम्म महाधिवेशन गर्ने मिति कार्यतालिकासहित सार्वजनिक गरिसकेको छ ।
यस्तै, देउवाले ईश्वरी न्यौपानेलाई महिला विभाग, केशवकुमार बुढाथोकीलाई राज्य प्रशासन विभाग, मोहनबहादुर बस्नेतलाई खेलकुद विभाग, वीरबहादुर बलायरलाई निर्माण व्यवसायी समन्वय विभाग र हरिप्रसाद नेपाललाई शिक्षा विभागको जिम्मेवारी दिएका छन् ।
