काठमाडौँ । अमेरिका, इटाली, स्पेन, फ्रान्स र बेलायत जस्ता मुलुकका लागि सन् २०२० एउटा दुखद वर्षको रूपमा स्थापित भएको छ ।

ती पाँच मुलुकले मात्रै विश्वभरको कुल मृत्युको ७३ प्रतिशत हिस्सा ओगटेका छन् ।

यो समाचार तयार पार्दासम्म इटालीमा १८ हजार ८४९ जनाको मृत्यु भइसकेको छ । त्यहाँ १ लाख ४७ हजार ५७७ जना संक्रमित छन् ।

त्यसैगरी अमेरिकामा पनि १८ हजार ७६१ जनको ज्यान गएको छ । त्यहाँ इटालीभन्दा तीन गुणाभन्दा बढी संक्रमित पुष्टि भइसकेको छ । पछिल्लो विवरणअनुसार अमेरिकामा ५ लाख ३ हजार १७७ जना संक्रमित पुगेका छन् ।

स्पेनमा १६ हजार ३५३ जनाको मृत्यु हुँदा संक्रमितको संख्या १ लाख ६१ हजार ८५२ पुगेको छ । फ्रान्समा १३ हजार १९७ जनाको मृत्यु भएको छ भने त्यहाँ संक्रमितको संख्या १ लाख २४ हजार ८६९ छ । बेलायतमा ७८ हजार ९९१ संक्रमित पुगेका छन् भने ९ हजार ८७५ जनाको ज्यान गएको छ ।

इटाली र अमेरिकामा विश्वभरको कुल मृत्युको १८/१८ प्रतिशतले मृत्युवरण गरेका छन् भने बेलायतमा पाँच प्रतिशतको मृत्यु भएका छ ।

पाँच देशको दुखद् सात दिन

पछिल्लो सात दिनमा अमेरिकाका लागि सबैभन्दा बढी दुखद् रहेको छ । त्यहाँ औसत संक्रमितको संख्या अघिल्लो साताभन्दा १० हजार बढेको छ । अघिल्लो साताको औसत दैनिक संक्रमित २२ हजारको हाराहारीमा हुँदा पछिल्लो सात दिनको औसत ३२ हजारभन्दा बढी दैनिक संक्रमित थपिएका छन् ।

त्यस्तै अघिल्लो साताको दैनिक औसत मृत्यु ७ सयको हाराहारीमा रहेकोमा अमेरिकामा पछिल्लो ७ दिनको दैनिक औसत मृत्यु १ हजार ६५५ पुगेको छ ।

तुलनात्मक रूपमा इटाली र स्पेनमा मृत्यु संख्या घटेको छ । इटालीको यो साताको औसत दैनिक मृत्यु  ५९५ र स्पेनको ६९७ रहेको छ ।

यो साता अमेरिकापछि उच्च औसत मृत्यु फ्रान्समा भएको छ । त्यहाँ दैनिक ९५५ जनाको ज्यान जाने गरेको छ । बेलायतमा पनि साताको दैनिक औसत ७६४ जना छ ।

बढी क्षति भएका पाँच देशको मृत्युको अवस्था

संक्रमणको आधारमा सबैभन्दा शीर्ष स्थानमा अमेरिका छ । त्यसपछि स्पेन, इटाली, फ्रान्स र जर्मनी परेका छन् ।

कोरोना भाइरसको उद्‍गम भूमि चीन संक्रमणको आधारमा ६ र मृत्युको आधारमा १० नम्बरमा छ ।

चीनपछि बढी संक्रमित मुलुकमा बेलायत, इरान र बेल्जियम  छन् ।

हेर्नुस् अहिलेसम्मको सबै देशको क्षति