रुवी भ्याली गाउँपालिकाका अध्यक्ष रामसिंह तामाङले शिक्षकलाई दुई थप्पड हानेर तिनै शिक्षकलाई पक्राउ गरेको घटनाबारे संसदमा प्रश्न उठेको छ ।
प्रतिनिधिसभाको बुधबारको बैठकमा राप्रपा सांसद धवल शम्सेर राणाले गाउँपालिका अध्यक्षलाई ज्ञापनपत्र बुझाउन गएका रुवी भ्यालीका शिक्षक ऋषिराम खनाललाई पालिका अध्यक्षले कुटपिट गरी घाइते बनाएको र उल्टै तिनै शिक्षकलाई पक्राउ गरी कारबाही गरेको भन्दै सरकारको जवाफ मागेका छन् ।
गाउँपालिका अध्यक्ष तामाङ माओवादी केन्द्रबाट निर्वाचित हुन् । बागमती प्रदेशका मुख्यमन्त्री शालिकराम जमकट्टेल र धादिङका एसपी गौतम मिश्रको दबाबमा शिक्षक खनाललाई पक्राउ गरी मुद्दा चलाइएको स्थानीयको आरोप छ ।
गत आइतबार गाउँपालिका कार्यालय सेर्तुङमा गाउँसभा अधिवेशनको क्रममा विवाद भएको हो । केही महिनादेखि गाउँपालिकाले शिक्षकहरूको तलब रोकेपछि निकासा पाउन भन्दै शिक्षक ऋषिराम खनालसहित पालिका अध्यक्षलाई ज्ञापनपत्र दिने प्रयास गरेका थिए । तर अध्यक्ष तामाङले ज्ञापनपत्र च्यात्दै शिक्षक खनाललाई हिर्काएका थिए ।
त्यसपछि केही युवाहरू अध्यक्षमाथि जाइलागेका थिए । तनावले अन्तिममा झडपको रूप लिएको थियो । त्यसपछि रुवी भ्याली ४ का युवा र अध्यक्ष तामाङबीच हानाहानको स्थिति सिर्जना भई गाउँसभा नै केही घण्टा रोकिएको थियो । प्रहरीले हस्तक्षेप नगरेको भए गाउँसभा अघि बढ्ने अवस्था समेत थिएन ।
अध्यक्ष निकटका रोमी घले, मर्कुस घले र ओमबहादुर तामाङसमेतले बोराङ गाउँका युवकहरूमाथि आक्रमण गरेपछि स्थिति थप तनावपूर्ण बनेको थियो । त्यसक्रममा शिक्षक ऋषिराम खनालसहित सुकलाल तामाङ र सुरेन्द्र तामाङ घाइते भएका थिए । अध्यक्ष समर्थकको आक्रमणबाट गम्भीर घाइते सुकलाल तामाङको टाउकोमा चोट लागेको थियो । घटनामा शिक्षक खनाल सख्त बनेका थिए । प्रहरीले आक्रमणकारीलाई बचाएर घाइते शिक्षक खनाललाई नियन्त्रणमा लिएको थियो ।
२०७४ सालको निर्वाचनमा राप्रपाले बहुमत जितेको रुवी भ्यालीमा गत स्थानीय निर्वाचनमा राप्रपालाई हराउन सबै प्रमुख राजनीतिक दल एक भएका थिए ।
यस्तो छ गाउँपालिका अध्यक्षको दादागिरी
