काठमाडौं उपत्यकामा जारी निषेधाज्ञाका विषयमा छलफल गर्नका लागि तीन जिल्लाका प्रमुख जिल्ला अधिकारी (सिडिओ) को बैठक आज बस्दैछ ।
काठमाडौं उपत्यकामा लागू निषेधाज्ञाको अवधि आइतबार मध्यरातिबाट सकिँदैछ । कोरोना नियन्त्रणका लागि गत वैशाख १६ देखि सुरु निषेधाज्ञाको अवधि थप्दै साउन १० गतेसम्म पुर्याइएको हो ।
निषेधाज्ञा थप्ने क्रममा क्रमशः खुुकुलो पनि बनाउँदै लगिएको छ । निश्चित समय तोकेर सबै प्रकारका पसल खोल्न दिएको उपत्यकामा छोटो दुरीका सवारी साधन पनि सञ्चालन गर्ने अनुमित दिइएको थियो ।
शनिबारबाट लामो दूरीका सवारीसाधन आवतजावत पनि खुला गरिसकेको छ । पछिल्लो समय निषेधाज्ञा खुकुलो भएसँगै कोरोना संक्रमणको दर बढिरहेको छ । यस्तोमा निषेधाज्ञा थप्ने वा नथप्ने विषयमा छलफलका लागि तीन जिल्लाका प्रमुख जिल्ला अधिकारीको बैठक बस्न लागेको हो ।
बैठक अपराह्न ४ बजे बस्नेछ । निषेधाज्ञा थपिएको खण्डमा यसलाई कसरी प्रभावकारी बनाउने भन्ने विषयमा पनि आज छलफल हुने काठमाडौं जिल्लाका सिडिओ कालीप्रसाद पराजुलीले जानकारी दिए ।
