पूर्वराजा ज्ञानेन्द्र शाहले नेपाली जनताको मनमा शान्ति छाउन नसकेको बताएका छन् । आज एक विज्ञप्ति जारी गर्दै सहयोगी स्वास्थ्यकर्मीहरूको कर्तव्यपूर्वक उपचार तथा शुभेच्छुकहरूको शुभकामना र याचनाकै कारण आफ्नो स्वास्थ्यमा पूर्ण सुधार भइसकेका बताउँदै उनले देशको चिन्ता गरेका हुन् । पूर्वराजा परिवारलाई कोरोना लागेको थियो भने आज पूर्ण सुधार भएको जानकारी गराएका हुन् ।
साथै जनताको मन अशान्त रहेको बेला कुनै पनि रमाइलो पल आएको नभएको हुँदा आफ्नो जन्मदिन नमनाउने पूर्वराजाले घोषणा गरेका छन् । जनताको निराशा र पिडालाई ध्यानमा राख्दै यही असार २३ गतेको जन्मदिनलाई उत्सवको रूपमा नमनाउने निर्णय गरिएको उनले बताएका हुन् ।
पछिल्लो राजनीतिक घटनाक्रमलाई हेर्दा थप संकट र अन्योलको अवस्थामा देखा परेको छ । परिवर्तन र अग्रगमनका चर्का नारा घन्काए पनि जनताले सुख सुविधा नपाइरहेको पूर्वराजाले बताएका हुन् । उनले विज्ञप्तिमा भनेका छन्- 'आफ्ना मूल्य, मान्यता तथा अस्तित्वलाई समाप्त पार्ने तर सही सिर्जना र सार दिन नसक्ने, आज नेपाली जनताको मन अशान्त रहेको छ । कोरोनाको खोप उपचार पाउन नसकेका कतिपय नेपाली निराश छन् ।'
