ललितपुर । कोरोना भाइरसबाट संक्रमित भई जावलाखेलस्थित अल्का अस्पतालको भेन्टिलेटरमा राखी उपचार गराइरहेका ललितपुरका एकजनाको निधन भएको छ । ललितपुरको मलपोखरीका ५० वर्षे पुरुषको उपचारको क्रममा शनिबार बिहान निधन भएको अल्का अस्पतालले जनाएको छ ।
मधुमेह, अल्सर तथा पायल्सका बिरामी ती व्यक्ति कोरोना भाइरसको संक्रमण देखिएपछि डाक्टरकै सल्लाहमा घरमै आइसोलेसनमा बसेका थिए । तर, स्वास्थ्य गम्भीर बनेपछि केही दिनअघि धोबीघाटस्थित मेगा अस्पतालको आइसियूमा भर्ना गरिएको थियो ।
डाक्टरले भेन्टिलेटरमा राख्नुपर्ने बताए पनि सरकारी तथा निजी अस्पतालमा भेन्टिलेटर खाली नहुँदा समस्या भएको थियो । एक दिन ढिला गरी बिहीबार बेलुका अल्का अस्पतालको भेन्टिलेटरमा सारिएको थियो ।
शुक्रबार बेलुकादेखि रेमडेसिभिर औषधि पनि दिन थालिएको थियो । तर, उपचारकै क्रममा शनिबार बिहान निधन भएको अस्पतालले जनाएको छ ।
