तनहुँको आँबुखैरेनी गाउँपालिकाकी एक कोरोना संक्रमित महिलाको काठमाडौंमा मृत्यु भएको छ ।
आँबुखैरेनी–४ निवासी ७६ वर्षीया महिलाको यही भदौ २४ गते काठमाडौंस्थित मनमोहन कार्डियोभास्कुलर थोरासिक एण्ड टा्रन्सप्लान्ट सेन्टरमा उपचारका क्रममा मृत्यु भएको गण्डकी प्रदेश स्वास्थ्य निर्देशनालयले आज जनाएको छ ।
ती महिलामा मुटुसम्बन्धी समस्या थियो । भदौ २० गते अस्पताल भर्ना भएकी उनलाई भदौ २३ गते कोरोना पुष्टि भएको थियो ।
उपचारका लागि चितवन पुगे पनि स्वास्थ्यमा सुधार नभएपछि उनलाई काठमाडौं लगिएको जनाइएको छ । यससँगै तनहुँमा कोरोना संक्रमणबाट मृत्यु हुनेको सङ्ख्या चार पुगेको छ ।
यसअघि व्यास नगरपालिका–१ की ५० वर्षीया महिलाको पोखरामा, व्यास–२ की २० वर्षीया युवतीको काठमाडौंमा र म्याग्दे गाउँपालिका–१ की ९६ वर्षीया महिलाको काठमाडौंमा मृत्यु भएको थियो ।