डोटीबाट निर्वाचित सङ्घीय सांसद तथा नेपाल कम्युनिस्ट पार्टी (नेकपा) का डोटी इन्चार्ज प्रेमबहादुर आलेले लकडाउनका कारण पीडित विद्यार्थीलाई राहत वितरण गरेका छन् । उनले कैलालीको धनगढीमा डेरा गरी अध्ययनरत विद्यार्थीलाई खाद्य सामग्री सहयोग गरेका हुन् । झन्डै महिनादिनदेखिको लकडाउनका कारण घर जान नपाएका र खाद्य सामग्री नभएका कारण विद्यार्थीहरूलाई छाक टार्न समस्या भएकाले उनले सहयोग गरेका हुन् । 

सांसद आलेका तर्फबाट नेकपाका युवा नेता विमल शाहीको नेतृत्वमा धनगढी नगरका विभिन्न क्षेत्रमा डेरा गरी बस्ने एक सय पाँच जनालाई खाद्य सामग्री वितरण गरिएको हो । लकडाउनका कारण अप्ठ्यारोमा परेका विद्यार्थीलाई छाक टार्न समस्या भएको गुनासो आएपछि खाद्य सामग्री वितरण गरिएको सांसद आलेले बताए ।

प्रति विद्यार्थी २५ किलो चामल, तीन किलो दाल, एक लिटर तेल र एक किलो नुन वितरण गरिएको शाहीले बताए । धनगढी उपमहानगर २ सन्तोषी टोल र चौराहा, वडा नम्बर ५ हसनपुर पिपल चौतारा, वडा नम्बर १ को शिवनगर पशुपति टोलमा डेरा गरी बस्ने विद्यार्थीहरूलाई राहत सामग्री वितरण गरिएको छ । यसअघि पनि  सांसद आलेले आफ्नै निजी खर्चमा डोटीका विभिन्न स्वास्थ्य संस्थामा कार्यरत चिकित्सक तथा स्वास्थ्यकर्मीले प्रयोग गर्ने स्वास्थ्य सामाग्री वितरण गरेका थिए ।