काठमाडौं। महिला पुनःस्थापना केन्द्र (ओरेक) ले विश्वव्यापी रुपमा फैलिएको कोरोना भाइरस (कोभिड–१९) सङ्क्रमणको विषम परिस्थितिमा मानसिक रुपमा प्रभावित र जोखिपूर्ण अवस्थामा रहेका व्यक्तिलाई मनोविमर्शकर्तामार्फत सेवा प्रदान गरिरहेको जनाएको छ ।
आजदेखि ३० औ वर्षमा प्रवेश गरेको अवसरमा ओरेकले व्यक्तिहरुमा आएको मानसिक तनाव र त्यसको असरलाई कम गर्न टेलिफोनमार्फत मनोसामाजिक विमर्श सेवालाई प्राथमिकता दिएको जनाएको हो । हाल २८ जना मनोबिमर्शकर्तामार्फत सेवा प्रदान भइरहेको ओरेकका कार्यकारी निर्देशक लुभराज न्यौपानेले जानकारी दिए ।
कोरोना भाइरस सङ्क्रमणको विपद्मा महिला, बालबालिका, अपांगताभएका व्यक्ति र ज्येष्ठ नागरिक, दैनिक मजदुरी गरेर जीवनगुजारा गर्ने समुदाय बढी सङ्कटको अवस्थामा रहेका उनले बताए । कोरोना भाइरस सङ्क्रमणको सन्त्रास, आइसोलेसनमा भएका बेला हुने चिन्ता र तनाव, घरेलु र सामाजिक हिंसामा परेकालाई मनोविमर्शकर्तामार्फत सेवा प्रदान गरिरहेको कार्यकारी निर्देशक न्यौपानेले बताए ।
'महिला तथा किशोरीमाथि हुने हिंसा तथा समस्या र स्वहेरचाह तथा तनाव व्यवस्थापनका लागि मनोविमर्शकर्तालाई सम्पर्क गर्न सकिनेछ, जसले नेपाली, मैथली, भोजपुरीलगायत स्थानीयभाषामा समेत टेलिफोनमार्फत मनोविमर्श सेवा दिनुहुने छ', उनले भने । यसबाहेक संस्थाका कार्यक्षेत्रमा कोरोना भाइरस, यसबाट सुरक्षित रहने उपाय र स्वहेरचाहका बारेमा सूचना प्रवाह भइरहेको ओरेकले जनाएको छ । साथै संस्थाद्वारा सञ्चालित लैङ्गिक विभेदमा आधारित हिंसाका प्रभावितलाई दिइने सुरक्षावासका सेवालाई निरन्तरता दिइएको छ ।