प्रवासी नेपाली एकता समाज (पानस) अमेरिकाले नेपालका लागि आएको मिलेनियम च्यालेन्ज कर्पोरेशन (एमसीसी) संसदबाट तत्काल अनुमोदन गर्न माग गरेको छ ।
पानसका अध्यक्ष राजेन्द्र शेरचनले विज्ञप्ति प्रकाशित गरी एमसीसी सम्झौतालाई ढिलो नगरी सार्वभौम संसदबाट अनुमोदन गरेर राष्ट्र निर्माणमा लाग्न आग्रह गरेका हुन् ।
पानसले एमसीसीमार्फत अमेरिकाले नेपाललाई करिव ५५ अर्ब रुपैयाँ निसर्त सहयोग गर्न लागेकोमा त्यसको स्वागत गर्दै यसविरुद्ध भइरहको प्रचारवाजी र भ्रमप्रति असहमित जनाएको छ ।
विकसित राष्ट्रका इन्ट्रेष्टहरू हुन सक्ने भन्दै त्यसप्रति चनाखो हुँदै राष्ट्र निर्माणमा आएको सहयोगको सदुपयोग गर्न पानसले माग गरेको छ ।
विश्वका ४५ वटा मुलुकमा एमसीसी सफल कार्यान्वयनको चरणमा रहेको जनाउँदै अध्यक्ष शेरचनको विज्ञप्तिमा यसमा शंका र भ्रम नपार्न आग्रह गरिएको छ ।
पानसले एमसीसी कार्यान्वयन भएका देशहरूको आर्थिक परिसूचक राम्रो बनेको उल्लेख गर्दै नेपालमा पनि प्रभावकारी कार्यान्वयनका लागि अनुरोध गरेको छ ।
राप्रपाको भ्रातृ संगठनको रुपमा रहेको पानस अमेरिकामा क्रियाशील छ ।
