राप्रपा केन्द्रीय सदस्य तथा प्रवास विभाग प्रमुख विजय खड्काले नेपालमा हिन्दु राष्ट्र पुनर्स्थापना गर्न भारतको सद्भाव आवश्यक रहेको बताएका छन् ।
राष्ट्रिय प्रजातन्त्र पार्टीको प्रवास विभाग भारतको अन्तर्गत आइतबार नयाँ दिल्लीमा भएको भेलामा प्रमुख खड्काले राष्ट्र, राष्ट्रिय पहिचान, हिन्दु राष्ट्र, राजसंस्था, सङ्घीयता जस्तो मुद्दामा नेपाली जनता सकारात्मक हुँदै गएको र यो विषय नेपाली जनताले संविधानको परिधिभित्र बाटै परिवर्तन गर्ने बताए ।
अहिले संविधानले दिएको अधिकार प्रयोग गर्दै सडक र सदनबाट नै परिवर्तन सम्भव रहेको बताउँदै उनले काँग्रेस र कम्युनिस्टले जस्तो राष्ट्रियता खतरामा पारेर मुलुकको आन्तरिक मामिलामा राप्रपा विदेशी सहयोग नखोज्ने पार्टी भएको धारणा राखे ।
समान विचारधारा भएको विजेता र तमाम हिन्दुवादी भारतीय जनताको सद्भाव नै परिवर्तनको लागि काफी हुने उनले बताए ।
विश्वको २५ भन्दा बढी मुलुकमा सङ्गठन रहेको प्रवासी नेपाली एकता समाजले भारतको विभिन्न सहरहरूमा सङ्गठन विस्तार गरेर अधिवेशन गर्ने भएको छ ।
कार्यक्रममा राप्रपा सहायक महामन्त्री राजाराम बर्तौलाले मुलुकले गुमाएको गौरवशाली इतिहासलाई फर्काउने अभियानमा प्रवासमा रहेका नेपालीहरूको महत्त्वपूर्ण भूमिका हुने विचार व्यक्त गरे ।
नेपालको राजनीतिमा स्पष्ट विचार र अलग पहिचानका साथ क्रियाशील राप्रपालाई स्थापित गर्न उच्च मनोबलका साथ पार्टी अगाडि बढिरहेको चर्चा गर्दै बर्तौलाले मुलुकमा भइरहेको बेथिति, विसङ्गति, बेरोजगारी र भ्रष्टाचारको विषयमा सबैको खबरदारी हुनु पर्नेमा जोड दिए ।
गरिबी र अशिक्षाको फाइदा उठाउँदै गाउँको गाउँ धर्म परिवर्तन गरिएकोमा तीव्र असन्तुष्टि व्यक्त गर्दै उनले सरकार धार्मिक द्वन्द्व गराउनेतर्फ उन्मुख भएको र राज्य सर्वसत्तावादको बाटोतर्फ गएको भन्दै रोष प्रकट गरे ।
कार्यक्रममा हिन्दु एकता मञ्च नेपालका संयोजक गणेश रिमाल, हिन्दुवादी नेताहरू महेन्द्र केसी, केबी थापा, राप्रपा बैतडी अध्यक्ष प्रेमबहादुर चन्द, आचार्य सुजन पराजुलीलगायतले शुभकामना मन्तव्य व्यक्त गरेका थिए ।
भेलाले अध्यक्ष हिक्मत चन्दको अध्यक्षतामा १५ सदस्यीय प्रवासी नेपाली एकता समाज दिल्ली गठन गरेको छ । समाजको उपाध्यक्षमा प्रहर्श मल्ल, उमाचन्द ठाकुर, सचिवमा गोकर्ण ओली, प्रवक्ता सिबी क्षेत्री र कोषाध्यक्ष शुभ दाहाल रहेका छन् ।
