इटालीमा भएको एनआरएनए कप अन्टरसिटी फुटबल प्रतियोगिताको उपाधि साबिक बिजेता नेपाली मितेरी मञ्च मिलान रातोले जितेको छ ।
आइतबार मिलानमा फाइनलमा मिलानले कोलेकियो नेपाली परिवार पारमालाई १०-२ को फराकिलो गोल अन्तरले पराजित गरेको हो ।
गैरआवासीय नेपाली संघ राष्ट्रिय समन्वय परिषद इटालीको आयोजनामा दुई दिनसम्म भएको प्रतियोगितामा ६ वटा टोली सहभागी भएका थिए।
नेपाली समाज पिसा र नेपाली समाज रोमले प्रतियोगिताको सेमिफाइनलसम्म पुगेका थिए ।
प्रतियोगितामा मिलानका अनिल पाण्डे सर्वोत्कृष्ट खेलाडी बने । नेपाली समाज पिसाका खेलाडी राज चौलागाईले सर्वाधिक १५ गोल गरेका थिए । उत्कृष्ट गोलरक्षकको उपाधि पारमाका मनित शेरबुजाले पाए ।
खेल हेर्न स्वीट्जरल्याण्डस्थित नेपाली राजदूतावास उपनियोग प्रमुख तीर्थराज वाग्ले, एनआरएनए इटालीका अध्यक्ष दिपेशकुमार रेग्मीलगायतको सहभागी हुन पुगेका थिए ।
नेपाल मितेरी मञ्चको सहयोगमा एनआरएनए इटालीले गत वर्षदेखि फुटबल प्रतियोगिता गर्दै आएको छ ।