राप्रपा अध्यक्ष तथा उपप्रधान एवं ऊर्जा, जलस्रोत तथा सिँचाइमन्त्री राजेन्द्र लिङ्देनले पदबहालीपछि कर्मचारीसँगको परिचयात्मक कार्यक्रम सुरु हुनासाथ आफू अगाडिको माइक समाते । मन्त्रीले के भन्न लागे भन्ने कौतुहल छायो । 

तर उपप्रधानमन्त्री लिङ्देनले भने परिचय गर्दा आफ्नो नाम र पद तथा अहिले कार्यरत स्थान त आउँछ भने सँगसँगै आफ्नो विशेषज्ञता र सो कार्यालय वा जिम्मेवारीमा आफू कार्यरत रहेको अवधि पनि भन्न आग्रह गरे । 

लिङ्देनले किन यसो भने ? उत्तर सहज छ । उनले त्यहाँ उपस्थित जनशक्तिको विज्ञता बुझ्न खोजेका हुन् । सँगसँगै विज्ञताअनुसारको भूमिका छ कि छैन, त्यो पनि उनले सुरुवातमै जान्न चाहे । अनि उपप्रधानमन्त्रीले आफ्नो मन्त्रालयमा कोही वर्षैसम्म एउटै जिम्मेवारीमा रहे वा नरहेको पनि बुझ्न चाहेको देखिन्छ ।

ऊर्जा मन्त्रालयको सभाकक्षमा खचाखच भरिएको स्वागत समारोहमा लिङ्देनले आफूले मन्त्रालयबाट नतिजा खोजेको बताए । 

लिङ्देनले आगामी पाँच वर्षमा गर्ने कामबारे प्राथमिकता तय गर्न एक कार्यदल गठनको निर्णयमा हस्ताक्षर गरेका छन् । सो कार्यदलमा उनकै चाहनामा गठन गरिएको जनाइएको छ । कार्यदललाई एक महिनाको समय दिइएको छ ।

पशुपतिनाथको दर्शन

आजै शपथपछि लिङ्देनसहित राप्रपाका तीन मन्त्री र एक राज्यमन्त्री गरी चारै जना पशुपतिनाथ मन्दिरको दर्शनका लागि पुगेका थिए । 'सनातन धर्ममा आस्था राख्ने नयाँ कामको सुरुवात गर्नु पहिले भगवानलाई सम्झने गरिन्छ । त्यसैले पशुपतिनाथ मन्दिर पुगेर आएका हौँ,' लिङ्देनले भने । 

कार्यकक्षमा पृथ्वीनारायण शाहको तस्बिर 

राप्रपाका चारै जना मन्त्रीहरूले आफ्नो कार्यकक्षमा पृथ्वीनारायण शाह राखेका छन् । पदबहालीमा जानुअघि नै राप्रपा प्रवक्ता मोहन श्रेष्ठमार्फत मन्त्रीहरूको कार्यकक्षमा पृथ्वीनारायण शाहको तस्बिर राख्न लगाइएको थियो । 

सरकारमा राप्रपाबाट एक उपप्रधान, २ मन्त्री र एक राज्यमन्त्री रहेका छन् । राप्रपाले वर्तमान सरकारमा सामेल हुनेमा लागि पुस २७ मा पृथ्वी जयन्तीको दिन बिदा दिनुपर्ने सर्त अघि सारेको थियो । त्यसैअनुसार सरकारले सार्वजनिक बिदाको घोषणा गरेको छ।

राप्रपाबाट विक्रम पाण्डे सहरी विकास र ध्रुवबहादुर प्रधान कानुन, न्याय तथा संसदीय व्यवस्था मन्त्री बनेका छन् भने दीपकबहादुर सिंह ऊर्जाराज्यमन्त्री बनेका छन् ।