माओवादी केन्द्रले एमालेसँग हातेमालो गरेसँगै सबैजसो राजकीय पदहरूबाट हात धुने अवस्थामा पुगेको कांग्रेसका नेताहरू फेरि देशको नेतृत्वमा आफ्नो दल फर्कने दाबी गर्न थालेका छन् र
कांग्रेस प्रवक्ता डा. प्रकाशशरण महतले कांग्रेसले छिट्टै पुनः देशको नेतृत्व लिने बताएका हुन् ।
आइतबार तारकेश्वर गाउँपालिका–३, तारुका चन्दनीमा आयोजित गोरु जुधाइ मेलाको उद्घाटन कार्यक्रममा उनले भने, “अहिले हामी केही प्राविधिक कारणले सत्ता बाहिर छौँ । बाहिर रहेर नै सरकारको खबरदारी गर्नेछौँ । तर, कांग्रेसले छिट्टै देशको नेतृत्व लिन्छ ।”
प्रतिनिधिसभा सदस्यसमेत रहेका महतले देश विकास कांग्रेसको नेतृत्वमा मात्र सम्भव रहेको दाबी गरे । उनले निर्वाचनमा जनताले सर्वाधिक सिट जिताएका दल सरकारबाट बाहिर हुन नमिल्ने तर्क गरे ।
“विभिन्न रूप रङका पार्टीहरू एक ठाउँमा उभिएर सत्ता चलाइरहेका छन् । देशको सर्वाधिक लोकप्रिय पार्टी बाहिर छ । कांग्रेसले आफ्नो ठाउँबाट सरकारलाई जनताको विकास निर्माणको चाहना पूरा गर्न लागि पर्नेछ,” उनले भने ।
गोरु जुधाइ परम्परा सांस्कृतिक, पर्यटकीय महत्त्वको रहेकाले यसलाई व्यवस्थित बनाउँदै लैजानुपर्ने प्रवक्ता महतले जोड दिए ।
बागमती प्रदेशसभाका कांग्रेस संसदीय दलका नेता बहादुरसिंह लामाले सांस्कृतिक महत्त्वको गोरु जुधाइ मेलाले स्थानीय पर्यटनको विकासमा भूमिका खेलेको बताए ।
