नेकपा एमालेका दुई जना सांसदले नेकपा (एकीकृत समाजवादी) पार्टीमा आफू रहेको र सोही पार्टीमा सनाखत गर्न माग गर्दै आज रिट दर्ता गराएका छन् ।
पाल्पा क्षेत्र नं.- २ बाट निर्वाचित सांसद सोमप्रसाद पाण्डे र कैलालीबाट राष्ट्रियसभा सदस्यमा निर्वाचित शारदा भट्टले एकीकृत समाजवादी पार्टीमा सनाखतको माग गर्दै आज रिट दायर गरेका हुन् ।
उनीहरूले एमाले छाडेर आफूहरू एकीकृत समाजवादीमा गएकाले निर्वाचन आयोग, संसदीय संसद्, सभामुख र राष्ट्रियसभाका अध्यक्षलाई विपक्षी बनाई रिट दायर गरेका हुन् । दुवैले आफूहरूले एमाले परित्याग गरेर नेकपा (एस) रोजे पनि आयोगले सनाखत नगराएको रिटमा उल्लेख गरेका छन् ।
सांसद पाण्डे र भट्टले एमालेको अभिलेखबाट आफूहरूलाई हटाउन र एकीकृत समाजवादीको अभिलेखमा राख्न अन्तरिम आदेश माग गरेका हुन् । पाण्डे एकीकृत समाजवादीका अध्यक्ष माधवकुमार नेपालका सम्धी हुन् ।
उनीहरूले गत ९ भदौमा एकीकृत समाजवादी दल दर्तामा रहेको प्रक्रियामा सनाखतका लागि आयोगमा उपस्थित हुँदा पनि सनाखत नगराएको रिटमा उल्लेख गरेका छन् । विधिवत् रूपमा सनाखतका लागि निवदेन दिएर आयोगमा उपस्थित हुँदा पनि आयोगले सनाखत नगरेको रिटमा भनिएको छ ।
रिटमा भनिएको छ, ‘हामी निवेदकलाई विधिवत सनाखत गराई एकीकृत समाजवादीको अभिलेखमा जनाउनुपर्नेमा विपक्षी आयोगले सो नगरी हालसम्म पनि हाम्रो नाम एमालेको अभिलेखमा जनाइरहेको रहेछ ।’
