हेटौंडा । बागमती प्रदेशको मन्त्रिपरिषद् आज (बुधबार) विस्तार हुँदैछ ।
यसअघि आजै मन्त्री छान्नका लागि मुख्यमन्त्रीको सरकारी निवासमा नेकपा एमालेको बैठक बसेको थियो ।
मुख्यमन्त्री अष्टलक्ष्मी शाक्यले मन्त्रिपरिषद् विस्तार गर्दै १० जना प्रदेशसभा सदस्यलाई सरकारमा सामेल गर्न लागेकी हुन् ।
एमाले विभाजनपछि अल्पमतमा परेकी शाक्यले विभाजनमा माधव नेपालको साथ छाडेकालाई समेत समेटेर सरकार विस्तार गरेकी हुन् ।
नवनियुक्त मन्त्री र राज्यमन्त्रीहरूको सपथग्रहण आजै दिउँसो २ बजेपछि हुने बताइएको छ । अहिले सरकारमा मुख्यमन्त्री शाक्य र मन्त्री केशव पाण्डेमात्र छन् ।
शाक्यले पार्टी विभाजनपछिको अवस्थामा संविधानबमोजिम संसद फेस गर्ने प्रमुख सचेतक दीपक निरौलाले बताए ।
थपिएकामध्ये बद्री मैनाली, सरस्वती बाटी, जुनेली श्रेष्ठ र जीवन खड्का राज्यमन्त्री हुन् ।
मन्त्री बन्नेहरुमा अजय क्रान्ति शाक्य(काठमाडौं), चन्द्र लामा (काभ्रेपलान्चोक), रचना खड्का (दोलखा), शान्तिप्रसाद पौडेल (रामेछाप), प्रदीप कटुवाल (सिन्धुली), विजय सुवेदी (चितवन), सरस्वती बाटी (भक्तपुर), बद्री मैनाली (नुवाकोट), जुनेली श्रेष्ठ (मकवानपुर) र जीवन खड्का (ललितपुर) रहेका छन् ।
