काठमाडौं । निर्वाचन आयोगमा आज (बुधबार) दुई वटा नयाँ पार्टी दर्ता भएका छन् ।
नेकपा एमालेबाट फुटेर बनेका नेकपा (एकीकृत-समाजवादी) र जनता समाजवादी पार्टीबाट फुटेर बनेको लोकतान्त्रिक समाजवादी पार्टी (लोसपा) विधिसम्मत दर्ता भएका हुन् ।
आज दिउँसो दुवै पार्टीका तर्फबाट पेश भएका नामहरुको सनाखत सम्पन्न भएको थियो ।
आयोगले साँझ दलका प्रतिनिधिलाई बोलाएर प्रमाणपत्र दिएको छ । दुबै दल दर्ता गर्ने निर्णय भएको र आजै प्रमाणपत्र दिइएको आयोगका प्रवक्ता राजकुमार श्रेष्ठले बताए ।
दल दर्ताको प्रमाणपत्र लिएपछि एकीकृत समाजवादीका नेता राजेन्द्र पाण्डेले अब सरकारमा जाने बाटो खुलेको प्रतिक्रिया दिए ।
अब प्रदेश र स्थानीय तहका जनप्रतिनिधिहरुलाई दल रोज्न २१ दिनको समय दिइनेछ ।
