काठमाडौं । नेकपा माओवादी केन्द्रका सांसद मात्रिका यादवले निवर्तमान प्रधानमन्त्री तथा एमाले अध्यक्ष केपी शर्मा ओलीबारे गरेको टिप्पणी संसदको रेकर्डबाट मेटाइएको छ ।
प्रमुख प्रतिपक्षी दल नेकपा एमालेको आपत्तिपछि सभामुख अग्नि सापकोटाको निर्देशनमा यादवको उक्त अभिव्यक्ति रेकर्डबाट हटाइएको हो ।
यादवले साउन २८ गते बसेको प्रतिनिधिसभा बैठकको विशेष समयमा निवर्तमान प्रधानमन्त्री ओली ‘मेन्टल्ली र फिजिल्ली फिट नभएको’ टिप्पणी गरेका थिए ।
यादवको उक्त टिप्पणी रेकर्डबाट हटाउन माग गर्दै प्रमुख विपक्षी दल एमालेले आजको संसद बैठकमा विरोध जनाएको थियो ।
बैठक सुरु हुनासाथ विपक्षी सांसदहरुले संसदमा उभिएर विरोध जनाएका थिए । त्यसपछि सभामुख सापकोटाले एमाले सचेतक विशाल भट्टराईलाई बोल्न समय दिएका थिए ।
भट्टराईले यादवको अभिव्यक्तिप्रति आपत्ति जनाएपछि सभामुखले यादवको अभिव्यक्ति हटाउन रुलिङ गरेका हुन् ।
सभामुखले रुलिङ गरेपछि बैठक सुचारु भएको छ । बैठकअन्तर्गत शून्य समयमा सांसदहरु बोलिरहेका छन् ।