काठमाडौं । नवनियुक्त हुने भएका प्रधानमन्त्री शेरबहादुर देउवाले आज शपथ ग्रहण गर्ने कार्यक्रम रहेको छ ।
सर्वोच्च अदालतको परमादेश अनुसार राष्ट्रपति कार्यालयले आज नेपाली कांग्रेसका सभापति देउवालाई प्रधानमन्त्री पदमा नियुक्ति गर्ने र शपथ ग्रहण गराउने तयारी सुरु गरेको हो ।
राष्ट्रपति कार्यालयका एक अधिकारीका अनुसार (आज) मङ्गलबार ५ बजे भित्रै कांग्रेस सभापति देउवालाई प्रधानमन्त्री पदमा नियुक्त गर्ने र शपथ गराउने तयारी भइरहेको छ ।
सर्वोच्चबाट सोमबार भएको फैसलाको पूर्ण पाठ राष्ट्रपति कार्यालयमा साँझ प्राप्त भएपछि सचिवालयले त्यसको अध्ययन सुरुसँगै नियुक्ति तथा शपथको तयारी थालेको राष्ट्रपति कार्यालयले जनाएको छ ।
