नेपाली कांग्रेसका प्रवक्ता विश्वप्रकाश शर्माले सरकारका मन्त्रीहरूले नै जातीय विभेदको पक्षपोषण हुने गरी सन्देश दिएको टिप्पणी गरेका छन् । प्रवक्ता शर्माले प्रधानमन्त्री केपी शर्मा ओलीलाई मेन्सन गर्दै रूपा सुनारलाई दलित भएकै कारण कोठा नदिएकी घरबेटीलाई शिक्षामन्त्री कृष्णगोपाल श्रेष्ठको गाडीमा चढाइएपछि यस्तो टिप्पणी गरेका हुन्।
प्रवक्ता शर्माले ट्विटमा प्रश्न गरेका छन्, 'जातीय विभेदको कहालीलाग्दो व्यथा अन्त्य गर्न साझा पहल गर्ने कि मन्त्रीले नै पक्षधरताको खुला सन्देश दिने?'
आफू दलितकी छोरी भएकै कारण आफूलाई कोठा नदिइएको भन्दै रुपा सुनारले प्रहरीमा घरबेटीविरुद्ध उजुरी दिएकी थिइन्। उनै घरबेटी बुधबार शिक्षामन्त्री श्रेष्ठको गाडीमा सिंहदरवार परिसरबाट सरर बाहिरिएकी थिइन्।
जातीय विभेदको प्रश्नमा राज्य कहाँ उभिनु पर्छ @PM_Nepal ? हिजो गिटार बजाउंदै समानताको गीत गाउँदै, आज गाडी गुडाउंदै, मन्त्रीको साइरन बजाउंदै राज्य एउटा पक्षमा उभिन मिल्छ ?
— Bishwa Prakash शर्मा (@bishwaprakash77) June 23, 2021
जातीय विभेदको कहालीलाग्दो ब्यथा अन्त्य गर्न
साझा पहल गर्ने कि मन्त्रीलेनै पक्षधरताको खुला सन्देश दिने ?
