जनता समाजवादी पार्टी (जसपा) को महन्थ ठाकुर समूह छिटै सरकारमा सहभागी हुने भएको छ । सम्मानजनक स्थानका साथै केही शक्तिशाली मन्त्रालय पाउने गरी सहभागी हुने जनाइएको छ। सरकारमा सहभागी हुने र अन्य विषयमा सोमवार प्रधानमन्त्री केपी शर्मा ओलीसँग छलफल गरेको जसपाको ठाकुर समूहले सकभर यसै हप्ताभित्र सहभागी हुने जानकारी दिएको छ । जसपालाई सरकारमा ८ वटा मन्त्रालय दिने सहमति जुटेको बताइन्छ । ८ वटा मन्त्रालय र २ राज्यमन्त्री लिएर सरकारमा जाने तयारी भएको बताइएको छ ।
अध्यक्ष महन्थ ठाकुर, नेता राजेन्द्र महतो, लक्ष्मणलाल कर्णसहितका नेताहरूले प्रधानमन्त्रीसँग जसपाले उठाएका माग र सरकारमा सहभागी हुनेबारे छलफल गरेका थिए । पूरा हुन बाँकी माग छिटै सम्बोधन भएमा आफूहरूलाई सरकारमा जान कुनै आपत्ति नरहेको आफूहरूले बताएको नेता लक्ष्मणलाल कर्णले जानकारी दिए ।
उनले भने ‘मधेश आन्दोलनका क्रममा जेलमा रहेकाहरूलाई छुटाउने, उनीहरूलाई राहत र क्षतिपूर्ति, संविधान संशोधनलगायतका मुद्दामा हामीहरू केन्द्रित छौं, सबै माग पुरा भएमा सरकारमा जान पनि सक्ने बारेमा हामिले बताएका छौं ।’
पार्टीलेअघि सारेका माग र मुद्दा सम्बोधन भएकोले ओली सरकारमा सहभागी हुने ठाकुरनिकट अर्का केन्द्रीय कार्यकारिणी समिति सदस्य शरतसिंह भण्डारीले बताउँछन् । उनले भने ‘सरकारमा जाने कुरा निश्चित हो, एक/दुई दिन लाग्न सक्छ।’
८ वटा मन्त्रालय र २ राज्यमन्त्री लिएर सरकारमा जाने तयारी भएको जसपामा आकांक्षी धेरै छन् । जसकारण निर्णय गर्न कठिन छ । उपेन्द्र यादव पक्षबाट ठाकुर समूहतर्फ लागेकाहरूलवाई पनि मन्त्री बनाउनुपर्ने छ । नभए उनीहरू फेरि यादव समूहमै लाग्नेछन् । विमल श्रीवास्तव, उमाशंकर अरगरिया, रुही नाज, कलुदेवी विश्वकर्मा र रेनुका गुरुङ यादव समूबाट आएका हुन् ।
ठाकुरनिकट स्रोतका अनुसार विघटित संसदको सदस्य नरहेका उमाकान्त झा, सर्वेन्द्रनाथ शुक्ला, अकवाल अहमद साह, वृषेशचन्द्र लालले पनि मन्त्री बनाउन लबिङ गरेका छन् । राजेन्द्र महतो, चन्दा चौधरी, अनील झा, राजकिशोर यादव, प्रमोद साह, चन्द्रकान्त चौधरी, शरतसिंह भण्डारी र अकवाल मियाँको पनि मन्त्रीमा दाबी छ।
जसपाको संसदीय दलमा ठाकुर–महतो पक्षको बहुमत छ । उनीहरूको पक्षमा २० सांसद छन् । ठाकुर पक्ष ओली सरकारमा सहभागी भए जसपा औपचारिक रुपमा विभाजन हुनेछ ।
