जनता समाजवादी जसपाका अध्यक्ष महन्थ ठाकुरले प्रधानमन्त्री केपी शर्मा ओलीलाई विश्वासको मत नदिने जानकारी गराएका छन् । आइतबार बिहान ओलीलाई भेट्न बालुवाटार पुगेका ठाकुरले विश्वासको मत नदिने बरु तटस्थ बस्ने जानकारी गराएका हुन् ।
प्रधानमन्त्री ओलीले विश्वासको मत लिने प्रयोजनका लागि सोमबार (वैशाख २७ गते) संसद्को विशेष अधिवेशन बोलाइएको छ ।
काँग्रेस सभापति शेरबहादुर देउवालाई भेटेपछि अध्यक्ष ठाकुर र वरिष्ठ नेता राजेन्द्र महतो प्रधानमन्त्रीलाई भेट्न बालुवाटार गएका थिए । जसपाका अर्का अध्यक्ष डा. बाबुराम भट्टराई र उपेन्द्र यादव पक्षले यसअघि नै ओलीलाई साथ नदिने बताइसकेका छन् ।
ठाकुर र महतोले पनि साथ नदिने भएपछि प्रधानमन्त्रीले विश्वासको मत पाउने सम्भावना सकिएको छ । एमालेकै माधव नेपाल पक्ष, नेपाली काँग्रेस र माओवादी केन्द्र पनि ओलीको विपक्षमा उभिएका छन् ।
प्रधानमन्त्री केपी शर्मा ओलीविरुद्धको उनकै पार्टीका माधव नेपाल पक्षले सामूहिक राजीनामा दिने तयारी गरेका छन् । उता नेपाली काँग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डले अविश्वासको प्रस्ताव दर्ताको अन्तिम तयारी गरेका छन् ।
पार्टीभित्रबाट ओलीलाई असहयोग भइरहँदा जनता समाजवादीले समेत तटस्थ बस्ने निर्णय लिएपछि ओलीले विश्वासको मत नपाउने सम्भावना बढेको छ । सोमबारसम्म राजनीतिक वृत्तमा कुन ठुलो उथलपुथल नभए ओली सरकारले विश्वासको मत नपाउने देखिएको छ ।
