काठमाडौं । प्रमुख प्रतिपक्षी नेपाली कांग्रेसको संसदीय दलको बैठक बस्ने भएको छ ।
प्रधानमन्त्रीले २७ गते विश्वासको मत लिने घोषणासँगै बदलिँदो परिस्थितिमा कसरी अघि बढ्ने भनी छलफलका लागि कांग्रेसले सो बैठक बोलाएको हो । कांग्रेस संसदीय दलका प्रमुख सचेतक बालकृष्ण खाडका अनुसार सो बैठक बानेश्वरस्थित ल्होत्से हलमा शनिबार दिउँसो २ बजे बस्नेछ ।
प्रधानमन्त्री ओलीले विश्वासको मत लिने प्रयोजनका लागि वैशाख २७ गते दिउँसो १ बजे प्रतिनिधि सभा बैठक बोलाएसँगै बूढानीलकण्ठमा राजनीतिक चाप बढेको छ ।
बुधबार देउवा भेट्न बुधबार ओली दलबलसहित देउवानिवास पुगेका थिए । प्रधानमन्त्री ओलीले २७ वैशाखमा विश्वासको मत लिने भएपछि नेताहरुको भेटवार्ता बाक्लो भएको छ । बुधबार देउवा निवास पुगेका ओलीले आफूलाई विश्वासको मत दिन कांग्रेससँग आग्रह गरेका थिए । तर, कांग्रेसले ओलीलाई विश्वासको मत दिन नसक्ने जवाफ दिएको थियो ।
यस्तै केही बेरअघि मात्रै वरिष्ठ नेता नेपाल बूढानीलकण्ठ पुगेका छन् ।
