काठमाडौं । नेकपा एमालेका अध्यक्ष केपी शर्मा ओलीले वरिष्ठ नेता माधवकुमार नेपाल र भीम रावललाई निलम्वन गरेका छन् ।
नेता नेपाल र रावलले पेस गरेको स्पष्टीकरण चित्तबुझ्दो नभएको भन्दै अध्यक्ष ओलीले उनीहरुलाई ६ महिनाका लागि निलम्वन गरेका हुन् ।
यसअघि नेपाल र रावलले बुझाएको स्पष्टीकरण चित्तबुझ्दो नभएको भन्दै प्रधानमन्त्री तथा पार्टी अध्यक्ष ओलीले उनीहरु कारबाहीयोग्य रहेको बताउँदै आएका थिए ।
उनीहरुलाई सोधिएको स्पष्टीकरणमा आफ्ना कुरा स्पष्ट पार्ने भन्दा पनि बढी विद्रूपीकरण, सार्वजनिक सञ्चार माध्यममार्फत् आफ्नो स्पष्टीकरण भनिएको चिज सार्वजनिक गर्नेतर्फ लागेको प्रधानमन्त्री ओलीका प्रेस सल्लाहकार सूर्य थापाले बताए ।
थापाले भने, ‘सुधारको स्थितिका निम्ति ठाउँ नराख्नुभएको हुनाले कारबाही गरिएको हो। ६ महिनाका लागि पार्टी सदस्यताबाट निलम्बन गरिएको हो।’
वरिष्ठ नेता नेपाललाई कारबाही गरिएको भनी सार्वजनिक गरिएको पत्रमा उनलाई सच्चिने मौकाका लागि हाललाई उक्त कारबाही गरिएको उल्लेख छ।
यसअघि एमाले र माओवादी केन्द्र मिलेर बनेको नेकपा आन्तरिक विवादमा फस्दा अध्यक्ष प्रचण्ड र नेता नेपाल समूहले प्रधानमन्त्री ओलीलाई दलको साधारण सदस्य नरहने गरी पार्टी अध्यक्षबाट हटाएको थियो।
