प्रधानमन्त्री केपी शर्मा ओलीले पार्टीको नाममा माधव नेपाल पक्षले छुट्टै गुटको भेला गरे कारवाही गर्न सक्ने चेतावनी दिएका छन् । प्रधानमन्त्रीको सरकारी निवास बालुवाटारमा मंगलबार पार्टीका केन्द्रीय सदस्यहरूका लागि गरिएको चियापान कार्यक्रममा बोल्दै उनले पार्टीमा बसेपछि उच्छृङ्खल गतिविधि गर्न तथा विधान विपरितका काम गर्न छुट नदिइने बताए ।
‘यस पार्टीमा अब उप्रान्त विधि विधानविरोधी क्रियाकलापमा छुट हुने अवस्था हुँदैन । अब सहेर बस्दैनौं । अचाक्ली भयो । पार्टीमा विधान छ, नियमावली र दलसम्बन्धी कानून छ । हामीले खोजेको अनुशासन हो । भोलिको भेलामा नेकपा एमाले सम्बद्ध कोही पनि नजान निर्देशन दिन्छु । सजग र सचेत गराउन चाहन्छु' उनले भने 'पार्टी अध्यक्षले बोलाउँदा नआउने कसको निम्ता पाए चियापानमा जानुहुन्छ ? यो त सबैलाई थाहा छ तर भन्न भएन । अझै केही समय बाँकी छ । भोलिको भेला गर्नुहुन्छ कि गर्नु हुन्न त्यो तमासा हेर्न बाँकी छ । भोलि एक नजर त्यता लगाइन्छ ।’
उनले थपे–‘एकथरी अनुहार आज चियापानमा देखिएनन्,यो राम्रो लक्षण हैन । उहाँहरुले त्यस्तो निर्णय गरेको होइन होला भन्ने म ठान्छु । अझै केही समय बाँकी छ । भोली गुटगत भेला राख्नुहुन्छ राख्नुहुन्न कतिको तमासा गर्नुहुन्छ एक नजर त्यता राखिनेछ । पार्टीलाई धम्क्याएर घुर्क्याएर ठेगान लगाउँछु भन्ने सोचेको छ भने पार्टी विधी विधान अनुसार चल्छ नचाहिने कुराका अगाडि लत्रिने कुरा छैन ।’
उनी सभामुखमाथि पनि खनिएका छ । सभामुखले मन्त्रीलाई बोल्न नदिएर सरकारलाई संवैधानिक दायित्वबाट बञ्चित गराएको आरोप लगाए । सभामुखविरुद्ध आक्रमक रुपमा प्रस्तुत भएका प्रधानमन्त्री ओलीले आफैले मुद्दा जितेर ल्याएको संसदमा विरोध गरेर कामै गर्न नदिने अवस्था आएको बताए ।
‘किन विघटन भएको थियो, के औचित्य थियो अव पुष्टि हुन्छ । मुद्धा लडेर जितेको ल्याएको संसद पहिलो दिनदेखि नै आफैले चल्न नदिने, आफै बहिष्कार गर्ने, आफै बिथोल्ने, नारा लगाउने अवस्था बन्यो । अध्यादेश संविधान अनुसार पहिलो बैठकमा पस्तुत गर्न दिइएन । संविधान अनुसार सरकारलाई पहिलो बैठकमा पेश गर्न नदिएर संविधान उल्लंघन गरियो । मन्त्रीलाई अध्यादेश प्रस्तुत गर्दै गर्दा सभामुखले रोकेर बैठक अर्को दिनलाई सारियो’ उनले भने ।
भोलि नेकपा एमालेका नेता माधवकुमार नेपाल, झलनाथ खनालसहितको टोलीले राष्ट्रिय कार्यकर्ता भेला आयोजना गरेका छन् । उनीहरुले उक्त भेला नरोक्ने भन्दै आजै तयारीका बारेमा पत्रकार सम्मेलन आयोजना गरेका छन् ।
