प्रधानमन्त्री केपी शर्मा ओलीले गृहमन्त्री रामबहादुर थापा ‘बादल’लाई नेपाल कम्युनिस्ट पार्टी (एमाले) को उपाध्यक्ष बनाउने तयारी गरेका छन् । फागुन २३ गते सर्वोच्चले एमाले र माओवादी केन्द्र ब्यूँताइदिएपछि पूर्वमाओवादी नेता बादल ओली नेतृत्वको एमालेतिर लागेका छन् ।
उनीसहित टोपबहादुर रायमाझी, लेखराज भट्ट, मणि थापा, प्रभु साह, गौरीशंकर चौधरी, दावा तामाङलगायत माओवादी नेता एमालेमै रहने भएपछि ओली पक्ष उनीहरूको व्यवस्थापनमा लागेको हो ।
एमालेमा पाँच अध्यक्ष पद छन्। एमालेकी तत्कालीन उपाध्यक्ष विद्यादेवी भण्डारी राष्ट्रपति निर्वाचित भएपछि एक उपाध्यक्ष पद रिक्त छ । सोही पदमा बादललाई लैजाने गरी ओली पक्षले तयारी गरिरहेको छ । एमालेमा वामदेव गौतम, भीम रावल, युवराज ज्ञवाली र अष्टलक्ष्मी शाक्य पनि उपाध्यक्ष हुन् ।
बादलसहितका नेताको व्यवस्थापनबारे अहिले प्रधानमन्त्रीनिवास बालुवाटारमा छलफल भइरहेको छ । छलफलमा प्रधानमन्त्री ओलीसहित एमालेका उपमहासचिव विष्णु पौडेल, स्थायी कमिटी सदस्य सुवासचन्द्र नेम्वाङ पनि सहभागी छन् । प्रधानमन्त्री ओलीसँग बादलसहितका नेताहरूले हिजो पनि छलफल गरेका थिए । त्यसपछि बादल, रायमाझी, थापा, भट्टले गृह मन्त्रालयमा छुट्टै छलफल गरेका थिए ।
