आइतबारदेखि सुरु भएको प्रतिनिधिसभा बैठकमा सांसद भीम रावलले 'प्रधानमन्त्री कुन पार्टीको हो' भनेर प्रश्न गरेपछि आज प्रधानमन्त्रीले सर्वोच्चमा गएर सोध्न आग्रह गरेका छन् ।
सोमबार अन्तर्राष्ट्रिय श्रमिक महिला दिवसका अवसरमा काठमाडौंमा आयोजित कार्यक्रममा प्रधानमन्त्री ओलीले भने, 'हुँदाहुँदा प्रधानमन्त्री कुन पार्टीको हो जानकरी पाउँ रे । सर्वोच्च अदालत जाउ कुन पार्टीको हो भन्ने जानकारी लिन ।' उनले उल्टै रावललाई प्रश्न गरे, 'मैले उहाँहरुलाई सोध्न नपरोस् तपाईं कुन पार्टीको हो ? मलाई साधारण सदस्यबाट पनि निकाल्नु भएको थियो । अदालतले भनेको पनि नसुन्ने।'
प्रधानम्नत्री ओलीले संसद् अधिवेशनको पहिलो बैठक सुखद नरहेको बताए, 'संसद् बैठकको पहिलो दिनमै गाँसमा झिंगा परेजस्तो भो ।' आइतबारको संसद् बैठक दाहाल-नेपाल समूहले बहिष्कार गरेको थियो भने प्रमुख प्रतिपक्षी दल कांग्रेस र जसपाले नाराबाजी गर्दै रोष्ट्रम घेरेका थिए । स्थगित भएकाे संसद् बैठक बुधबार दिउँसो १ बजे बस्दैछ ।
