नेकपा दाहाल–नेपाल समूहका अध्यक्षद्वय पुष्पकमल दाहाल र माधवकुमार नेपालले संसदीय दलको नेतामा आफ्नो समूहलाई मान्यता दिन सभामुख अग्नी सापकोटालाई आग्रह गरेका छन् । आइतबार बिहान दाहाल र नेपालले संसद् सचिवालयमा पुगेर सभामुख सापकोटालाई भेटेर यस्तो आग्रह गरेका हुन् ।
खास गरी नेकपा विवादपछि सो पार्टीमा संसदीय दलको नेता र प्रमुख सचेतक दुई–दुई जना छन् । प्रचण्ड–माधव पक्षले संसदीय दलको नेताबाट प्रधानमन्त्री ओलीलाई हटाएर पुष्पकमल दाहाल प्रचण्डलाई बनाएको छ भने ओली पक्षले प्रचण्ड–माधव पक्षमा लागेको प्रमुख सचेतक देव गुरुङलाई हटाएर विशाल भट्टराईलाई तोकेको छ ।
यस्तो अवस्थामा आज बस्ने प्रतिनिधिसभा बैठकमा सभामुख अग्नि सापकोटाले दलको नेता कसलाई मान्यता दिने हुन् भन्ने विषय जटिल बन्दै गर्दा प्रचण्ड–नेपाल पक्षले आफ्नो पक्षमा निर्णय लिन आग्रह गरेका हुन् ।
यता दलको नेताको हैसियतमा सभामुख सापकोटाले प्रचण्डलाई बोल्न दिएमा ओली पक्ष नै संसद बैठक अवरुद्ध गर्ने तयारीमा छ । सभामुख सापकोटा पूर्वमाओवादीका हुन् । प्रचण्डकै जोड बलमा उनलाई सभामुख बनाइएको थियो । यस कारण प्रचण्ड–नेपाल पक्षको आग्रह सभामुखले मान्न सक्ने ओली पक्षको आङ्कलन छ ।
दलको प्रमुख सचेतक भट्टराईलाई बनाएको घोषणा गरेको ओली पक्षले उनलाई सभामुख सापकोटाले भेट दिन अस्वीकार गरेको भन्दै असन्तुष्टि जनाएको छ । प्रतिनिधिसभा बैठक बस्नुअघि कसरी सभा सञ्चालन गर्ने भन्ने दलीय सहमतिका लागि सभामुखले प्रतिनिधित्व गर्ने दलका प्रमुख सचेतकहरूसँग कार्य व्यवस्था परामर्श समितिको बैठक बस्ने चलन छ । तर आज परामर्श समितिको बैठक बस्ने नबस्ने टुङ्गो लागि सकेको छैन ।
यता संसद् सचिवालयले भने शनिवारै प्रतिनिधिसभाको सम्भावित कार्यसूची सार्वजनिक गरिसकेको छ । यद्यपि दलहरू बीचको परामर्शमा उक्त कार्यसूची परिवर्तन हुनसक्ने संसद सचिवालय स्रोतको भनाइ छ ।