काठमाडौं । दाहाल-नेपाल समूह (नेकापा) की नेतृ तथा बाग्मती प्रदेश संसदीय दलकी नेतृ अष्टलक्ष्मी शाक्यले सभामुख सानुकुमार श्रेष्ठले सिस्टमको धज्जी उडाएको बताएकी छन् ।
सोमबारका लागि बोलाइएको बैठक आइतबार नै सूचना टाँसेर स्थगित गरेको बताउँदै उनले सोमबार सो कुरा बताएकी हुन् । नेतृ शाक्यले श्रेष्ठले अल्पमतमा रहेको सरकारलाई सहयोग पुर्याएर उसैको लाचार छाँया बनेको पनि बताइन् ।
प्रदेशसभामा मुख्यमन्त्रीविरुद्ध अविश्वासको प्रस्ताव दर्ता भएको अवस्थामा सो विषय टुङ्ग्यानतर्फ लाग्नुको सट्टा बैठक स्थगित गरेर जिम्मेवारीबाट पन्छिएरको बताइन् । ‘बैठक स्थगित गरेको र स्वेच्छाचारी ढङ्गबाट अलोकतान्त्रिक काम गरेकाले यसको घोर विरोध गर्न आवश्यक छ ।’
त्यस्तै, उनले सभामुखले कुनै दल र प्रदेशसभा सदस्यको मान्यता नराखेको बताइन् । ‘भेट्न खोज्दासमेत भेट्न नमानेकोमा दुख लागेको छ,’ सभामुख श्रेष्ठलाई आफूले गरेको गल्ती सच्याएर तुरुन्त बैठक डाक्न समेत नेत्री शाक्यले आग्रह गरिन् ।
सभामुखले बैठक स्थगित गरेपछि प्रचण्ड-नेपाल समूह हेटौँडास्थित प्रदेशसभा सचिवालय परिसरमा बैठकको माग गर्दै नाराबाजी भएको छ ।