काठमाडौं । सहरी विकासमन्त्री प्रभु साहले तराई, मधेसमा प्रधानमन्त्री केपी शर्मा ओलीको जय जयकार भएको बताएका छन् ।
आफ्नो बोलीमा अडिग रहेकाले ओलीको जय जयकार भएको उनले बताए ।
शनिबार काठमाडौंमा रहेका प्रदेश १ का कार्यकर्ता भेलामा बोल्दै मन्त्री साहले प्रधानमन्त्री ओली मधेस विरोधी भएको भन्ने कुरामा सत्यता नभएको बताए । प्रचण्डले आफ्नो बोली फेरिरहेको र जनतालाई धोका दिएको साहले आरोप लगाए ।
तर ओली विगतदेखि वर्तमानसम्म आफ्नो बोलीमा अडिग रहेकाले ओलीलाई आफूहरुले साथ दिएको समेत उल्लेख गरे ।
‘ओली ३० वर्ष अगाडि, १० वर्ष अगाडि जे बोल्नुभएको छ अहिले पनि त्यही बोल्दै आउनुभएको छ । सत्यको पछाडि लाग्छ मधेसी जनता’, उनले भने ।
उनले मधेसको विकासमा प्रधानमन्त्रीको उल्लेख्य योगदान रहेको बताए । उनले मधेसी जनताले विश्वासका साथ ओलीलाई साथ दिएको बताए ।
पार्टी (नेकपा) र सरकारको वैधानिक नेतृत्व ओली नै भएको उनले दाबी गरे । ओलीलाई जालझेल र झुटको सहायतामा प्रचण्ड(माधव पक्षले निकाल्ने तयारी गरेकोले ओलीले स्थायित्व र देशको रक्षाका लागि संसद विघटन गरेको साहले बताए ।
प्रचण्डले माओवादी आन्दोलन, जनयुद्धका कमाण्डर र घाइते तथा अयोग्य बनेका लडाकुहरुमाथि पदको राजनीति गरेकाले आफूहरुले साथ छाडेको साहको भनाइ छ ।
प्रचण्ड आफूअनुकुल बोली फेरिरहने पात्र भएको उनले आरोप लगाए ।
