काठमाडौं । नेकपाको प्रचण्ड-नेपाल समूहले ३१५ केन्द्रीय समितिको हस्ताक्षरसहितको विवरण आज (बुधबार) निर्वाचन आयोगमा बुझाउँदै छ ।
वैधानिक नेकपा आफू रहेको जानकारी, प्रमाणसहित मंगलबार केन्द्रीय समिति बैठकले गरेका निर्णयसहित नेताहरू आयोग जान लागेका हुन् ।
केन्द्रीय सदस्यको हस्ताक्षरसहित सबै विवरण बुझाउन नेकपा नेताको टोली निर्वाचन आयोग जाने एक नेताले जानकारी दिए ।
यसअघि नेकपा बनेपछि ४४१ सदस्यको विवरण आयोगमा बुझाइएको थियो ।
नेकपाको आधिकारिक पार्टी हुन बहुमत सदस्य र ती सबैको विवरण, नागरिकतासहित सनाखत हुनुपर्ने व्यवस्था छ ।
सोही विवरण प्रचण्ड-नेपाल पक्षले बुझाउन लागेको एक नेताले बताए ।
सोमबार स्थायी समिति सदस्य लीलामणि पोखरेलले निर्वाचन आयोग पुगेर प्रधानमन्त्री केपी शर्मा ओलीलाई अध्यक्ष पदबाट हटाइएको र केन्द्रीय सदस्यको बहुमत प्रचण्ड-नेपालका पक्षमा रहेको जानकारी दिएका थिए ।
निर्वाचन आयोगबाट पार्टीको नाम, चुनाव चिह्न पनि बहुमत सदस्य भएको पक्षले नै पाउनेछ ।