संवैधानिक परिषद‍्सम्बन्धी अध्यादेश आएपछि थप संकटतर्फ बढेको सत्तारुढ नेपाल कम्युनिष्ट पार्टी (नेकपा)मा अध्यक्ष तथा प्रधानमन्त्री केपी शर्मा ओलीइतर पक्ष थप आक्रमक शैलीमा अघि बढेको छ । 

बुधबार बसेको स्थायी कमिटी बैठकले अध्यादेश फिर्ता लिने निर्णय गरे पनि ओलीले फिर्ता नलिएपछि अर्का अध्यक्ष पुष्पकमल दाहाल (प्रचण्ड) र वरिष्ठ नेता माधवकुमार नेपाल पक्ष शसक्त रुपमा लागेका छन् । उनीहरुले दैनीकजसो आन्तरिक छलफल तथा भेला गर्दै ओलीलाई दबाब दिएरै गलाउन सकिने रणनीति बनाउँदैछन् । 

प्रचण्ड–नेपाल समूह पछिल्ला दिनमा ओलीसँगको विवाद अब सहमति र सम्झौताबाट मात्रै नमिल्ने बुझाइमा छन् । पूर्वमाओबादीका नेताहरू तथा वरिष्ठ नेता नेपालकै केही नेताहरूका अनुसार गुरुङका अनुसार ओली पक्षसँग सम्झौता गरेर अघि बढ्न सकिँदैन । 
स्थायी कमिटी सदस्य तथा संसदीय दलका प्रमुख सचेतक देव गुरुङ भन्छन् ‘अहिलेको विवाद पद बाँडफाँड वा लेनदेनको होइन । एकता र रुपान्तरणको हो । एकता र रुपान्तरण विरोधी कामसँग सम्झौता गर्न सकिँदैन ।’

पछिल्लो समय ओली पक्ष र प्रचण्ड नेपाल पक्ष दुबैले गुटभेलालाई आक्रामक बनाउँदै लगेका छन् । अहिले भइरहेका गुट भेला पनि ओलीले नै निम्ताएको परिणाम भएको प्रचण्ड–नेपाल पक्षको आरोप छ । ओलीले फायर खोलेपछि आफूहरू बाध्य भएको प्रचण्ड-नेपाल पक्षको आरोप छ । नेताहरु भन्छन् ‘ओली कहिल्यै सुध्रिदैनन् । यसैले बल प्रयोग गर्नुको विकल्प छैन ।’

बल प्रयोग गर्नुको अर्थ पार्टीको जारी स्थायी कमिटि बैठकबाट बहुमतले पार्टी अध्यक्षबाट हटाउने र संसदीय दलबाट समेत दलको नेताबाट हटाएर प्रधानमन्त्रीबाट हटाउने रणनीति रहेको बुझ्न सकिन्छ ।

कार्यकारी अध्यक्ष समेत रहेका प्रचण्डले आफूहरूले ओलीलाई नियन्त्रण गरेरै छाड्ने चेतावनी दिएका छन् । शुक्रबार जनवर्गीय संगठनको कार्यालय पेरिसडाँडा भएको प्रचण्ड–नेपाल समूहको प्रदेश १ स्तरीय भेलालाई सम्बोधन गर्दै अध्यक्ष प्रचण्डले आफूहरूको रणनीति खुलाए । प्रधामन्त्री ओली पार्टी निर्णयभन्दा बाहिर गएकाले नियन्त्रण गर्नुपर्ने अवस्था आएको र त्यो पुरा गरेरै छाड्ने प्रचण्डको भनाइ थियो ।

उनले भने ‘अध्यक्ष ओलीलाई नियन्त्रण गर्न खोजेका हौँ, उहाँले पार्टीको निर्णय मान्नुभएन, निर्णय मानेर अगाडि बढ्नुहोस् भन्न खोजेका हौँ’, प्रचण्डको भनाइ उद्धृत गर्दै भेलामा सहभागी केन्द्रीय सदस्य जगन्नाथ खतिवडाले भने ।

कार्यक्रममा वरिष्ठ नेता नेपाल र झलनाथ खनालले  समेत प्रधानमन्त्री ओली सर्बसत्तावाद शैलीमा अघि बढेकाले नियन्त्रणमा ल्याइने बताए । ‘सबै समस्याको जड नै प्रधानमन्त्री ओली नै हुन्, केही दिनपछि सबै समास्या समाधान हुन्छ’ उनीहरूको भनाइ थियो । केही दिनपछि सबै समस्या समाधान हुने उनीहरूको भनाइको आशय बुहमतबाटै ओलीलाई हटाउने भन्ने बुझिएको बैठकमा सहभागी नेताहरू बताउँछन् ।

बुधवार प्रधानमन्त्रीले सहमति विपरित संवैधानिक परिषदको बैठक बोलाएपछि प्रचण्ड बालुवाटार पुगेका थिए । उनले बालुवाटारमा पुगेर ओलीसँग असन्तुष्टि जनाएका थिए । प्रचण्ड निकट स्रोतका अनुसार ओली-प्रचण्डबीच चर्काचर्की नै भएको थियो । प्रचण्डले सहमति पालना नगरेकाले राम्रो सन्देश नजाने भनेका थिए भने ओलीले तत्काल अध्यादेश फिर्ता नहुने बताएका थिए । 

प्रधानमन्त्री ओली निकटका नेताहर"का अनुसार उनी आफ्नो र राष्ट्रपतिको समेत ‘फेस–सेभिङ’ हुनेगरी सहमति चाहन्छन् । यसकारण उनले अध्यायदेश फिर्ता लिने सहमति गरे पनि कार्यान्वयन गरेका छैनन् । 

नेकपाको विवाद ८ महिनायता जारी छ । भदौ २६ मा भएको सहमतिले अल्पकालीन समाधान गरे पनि विवादको स्थायी समाधान गरेको थिएन । ओली सहमतिबाट पछि हटेपछि उनीइतरका नेताहरू उनी विरुद्ध रणनीति बनाउन लागि परेका थिए । तर सचिवालय र स्थायी कमिटी बैठक बस्दै स्थगित हुदै आएको छ ।

‘कुलिङ’ पिरियड भनिएको यो समयमा ओली समूहका नेताहरू सहमतिका लागि सक्रिय हुने गरेको भए पनि सफलता हात लागेका छैन् । उनीहरूले प्रचण्डलाई सहमति भन्दै अल्झाउने र उनी निकटका नेताहरुलाई विभिन्न प्रलोभनमा आफूतिर तान्ने रणनीति अपनाएका छन् ।

प्रचण्ड–नेपाल गुटलाई धम्काउन ओलीले विभिन्न कदम चाल्दै आएका छन् । उनले बैसाख ९ मा ल्याएको अध्यादेश आफू विरोधी नेतालाई धम्काउनकै लागि फेरि ल्याएका थिए । पार्टी कमिटीका बैठकमा पनि बेला बेला नेताहरूलाई तर्साउन कै लागि ओलीले आफू दुवै पदबाट कुनै पनि हालतमा नछोडन बरु आफ्नाविरुद्ध कदम चालिए महाकदम चाल्ने त्रास देखाइरेका छन् ।

प्रचण्ड ओलीलाई सहमत गराउन लागिपरेका नेकपा स्थायी कमिटी सदस्य तथा नेकपा संसदीय दलका उप–नेता सुवास नेम्वाङ आफू जहिल्यै अध्यक्षहरूबीच सहमति गराउन लागि परेको बताउँछन् ।  उनी दुवै पक्षले आफ्ना अडानबाट पछि नहटदा तत्काल विवाद समाधान हुने सम्भावना कम भएको बताउँछन् ।