काठमाडाैं । राष्ट्रपति कार्यालय शीतल निवासमा राष्ट्रपति कार्यालयका सचिव हरि पौडेललाई कुरेर झण्डै ६ घण्टासम्म बसेका सत्तारुढ नेपाल कम्युनिस्ट पार्टी (नेकपा) का सांसदहरू निवेदन दर्ता नगरी फिर्ता भएका छन् ।
नेकपाका दुई अध्यक्षबीच संवैधानिक परिषद् सम्बन्धी अध्यादेश फिर्ता गर्ने र विशेष अधिवेशनको माग नगर्ने सहमति भएपछि नेता भीम रावल, पम्फा भुसालसहितका नेताहरू शीतल निवासबाट फर्किएका हुन् ।
उनीहरू नेकपाका ८३ जना सांसदको हस्ताक्षरसहितको निवेदन बोकेर दिउँसो १२ बजेर ४८ मिनेटदेखि शितल निवासमा सचिव कुरेर बसिरहेका थिए । आफूहरू शीतल निवासमा सचिव कुरेर पाँच घण्टासम्म बसेको तर कार्यकारी अध्यक्ष प्रचण्डले निवेदन दर्ता नगर्न भन्नु भएपछि आफूहरू निवेदन दर्ता नगरि फिर्ता भएको नेता पम्फा भुसालले बताइन् । ।
उनले भने– ‘हामीले निवेदन दर्ता नगरिकन शीतल निवासबाट फिर्ता नहुने भनेका थियौँ, कमरेड प्रचण्डले सहमति भयो भनेर भन्नुभयो, उहाँले फिर्ता हुन आग्रह गरे । त्यसपछि हामी दर्ता नगरि फिर्ता हुँदै छौँ ।’
त्यस्तै नेता रावलले भने सचिवले निवेदन दर्ता गर्छु भन्दै झुलाएकाे बताए । उनले भने– ‘हामी ६ घण्टासम्म कुरेर बस्याैँ, सचिवले दर्ता गर्ने आश्वासन दिए पनि बेपत्ता भए, त्यसपछि अध्यक्ष प्रचण्डकाे निर्देशन आयाे र हामी फिर्ता भयाैँ ।’
राष्ट्रपति भण्डारीले अध्यादेश ल्याएसँगै सांसदहरूको हस्ताक्षर बोकेर विशेष अधिवेशन बोलाउन माग गर्दै नेताहरू शीतल निवास पुगेका हुन् ।
