काठमाडौं । सत्तारुढ नेपाल कम्युनिष्ट पार्टी (नेकपा) का स्थायी समिति सदस्य देवेन्द्र पौडेलले पार्टीमा देखिएको विवाद समाधान भएको बताएका छन् ।
मंगलबार जनयुद्धकालीन सहिद सुरेश वाग्ले ‘वासु’ र भीमसेन पोखरेल ‘बैरागी’को २१ औँ स्मृति दिवसमा पौडेलले यस्तो बताएका हुन् ।
सो कार्यक्रममा सहभागी भएका उनले पार्टीमा कुनै विवाद नभएको बताउँदै नेकपा अझ सुदृढ भएको बताए । नेता पौडेलले भने, ‘सहिदका बलिदान खेर जान नदिन पार्टीलाई एकताबद्ध गर्नुबाहेक अरु केही छैन ।
गणतन्त्र स्थापनादेखि पछिल्लो राजनीतिक, सामाजिक परिवर्तनमा जनयुद्धले पुर्याएको योगदानलाई कसैले पनि कम आँक्न नहुने बताउँदै उनले भने, ‘कसैले हिजोको आन्दोलन र बलिदानलाई लिएर तुच्छ टिप्पणी गरेको हामी पाउँछौँ, त्यो अल्पज्ञान हो । जनयुद्ध समाज रुपान्तरणका लागि लिइएको सचेत पहलकदमी थियो ।’
