कोरोना भाइरस संक्रमित बढ्दै गएपछि मुलुकको मुख्य प्रशासनिक निकाय सिंहदरबार प्रवेशमा कडाइ थालिएको छ ।
गृह मन्त्रालयका अनुसार सिंहदरबारमा काम विशेषले जानेका लागि दिइँदै आएको भिजिटर पास र इ–पास बन्द गरिएको छ ।
काठमाडौं उपत्यकामा कोरोना संक्रमितको सख्या बढेसँगै कडाइ गरिएको हो ।
यस्तै कर्मचारी र यसअघि नै पास पाइसकेकाको हकमा भने स्वास्थ्य सुरक्षा मापदण्ड पुरा गरेर प्रवेश दिइएको छ । पछिल्लो समय काठमाडौं उपत्यकामा कोरोना संक्रमितको संख्या बढ्दो क्रममा छ ।
कोरोना संक्रमितको सख्या बढेसँगै उपत्यका भित्रिने नाकाहरूमा चेकजाँचमा कडाइ गरिएको छ ।
सरकारले लकडाउन केही खुकुलो गरेसँगै विभिन्न नाका हुँदै काठमाडौँ प्रवेश गर्नेहरूको संख्या बढ्दै गएपछि केही दिन नाकामै स्वाव संकलन गरिएको थियो ।
सरकारले अहिले भने सवारी पास जाँचमा पनि कडाइ गरेको हो । उपत्यका प्रवेश पास नभएका सवारी साधनलाई प्रहरीले नाकाबाटै फिर्ता पठाएको छ ।
यसअघि नाकासम्म एउटा सवारी सधानमा आएर पैदल हुँदै उपत्यका प्रवेश गर्ने र उपत्यका छिरेपछि अर्को गाडीमा आउने गरेका यात्रुहरूलाई पनि रोक लगाइएको छ ।
प्रहरीले आज पैदल हिँडेर प्रवेश गर्न खोज्ने विना पासका यात्रुहरू सबैलाई फर्काएको छ ।
