काठमाडौं । नेकपा अध्यक्ष तथा प्रधानमन्त्री केपी शर्मा ओलीविरुद्ध थप रणनीति तय गर्न अध्यक्ष दाहाल र वरिष्ठ नेता माधवकुमार नेपाल छलफलमा जुटेका छन् ।
प्रधानमन्त्री ओलीले बुधबार बिहान आफूनिकट नेताहरुसँग छलफल गरेकै दिन दाहाल–नेपाल गुट छलफलमा जुटेका हुन् ।
जारी छलफलमा अध्यक्ष दाहाल, वरिष्ठ नेताद्वय झलनाथ खनाल र नेपाल, उपाध्यक्ष बामदेव गौतम, प्रवक्ता नारायणकाजी श्रेष्ठलगायत स्थायी कमिटी सदस्य सहभागी छन् ।
ललितपुरको एक होटलमा करिब एक घण्टादेखि जारी छलफलले प्रधानमन्त्री ओलीबारे थप रणनीति बनाउन बताइएको छ ।
पछिल्लोसमय प्रधानमन्त्री केपी शर्मा ओलीको विपक्षमा नेकपाका अर्का अध्यक्ष र वरिष्ठ नेता खुलेर लागेका छन् ।
मंगलबारको बैठकमा अध्यक्ष दाहालले सीधै पार्टी अध्यक्ष तथा प्रधानमन्त्रीको दुवै पदबाट राजीनामा मागेका थिए ।
स्थायी कमिटी सदस्यहरुले पनि ओलीको राजीनामा मागेका छन् ।
