पछिल्लो समय न्यायालयका निर्णयहरूमाथि पनि प्रश्न उठिरहेको अवस्थामा सत्तारुढ दल नेपाल कम्युनिस्ट पार्टी (नेकपा) का प्रवक्ता नारायणकाजी श्रेष्ठले पनि आलोचना गरेका छन् । उनले न्यायालयका निर्णयहरूमाथि प्रश्न गरेका छन् ।
आइतबार सामाजिक सञ्जालमा उनले लेखेका छन्, ‘के हुँदै छ यस्तो ? न्यायालय र सिंगै राज्य प्रणाली र व्यवस्थामाथि नै प्रश्न उठ्ने गरी न्यायालयद्वारा निर्णय किन गरिँदै छ ? वास र छाक टार्ने समस्याबाट पीडित गरिब चेपाङ युवाको हत्या संवेदनशील सुरक्षा अंगबाट नै दर्दनाक ढंगले पिटिपिटी किन गरिन्छ र सुकुमबासी झुप्रामा आगो किन लगाइन्छ ? कथित दलित भएकै आधारमा बर्बर सामूहिक हत्या किन गरिन्छ ? हद भयो, असह्य भयो ।’
उनले थप लेखेका छन्, ‘न्याय स्थापित होस् र दोषीमाथि कारबाही होस् । यो अवाजलाई समयमै सम्बोधन गरौँ र राज्यका अंगहरूरुको लोकतन्त्रअनुरूप पुनर्संरचना गरी लोकतन्त्रलाई व्यवहारतः अभ्यास गरौँ र विकास गरौँ । अन्यथा निराशा, आक्रोस, अनिश्चय र तरलताको परिणाम के होला ? समयमै सबैले सोचौँ । परिणाम सधैँ सकारात्मक नै हुन्छ भन्न सकिन्न ।’
उनले सामाजिक सञ्जाल फेसबुकमा आक्रोशमिश्रित स्ट्याटस लेख्दै सर्वसाधारण मानिसमाथि राज्यका संयन्त्रहरू खनिएको भन्दै न्याय स्थापित हुनुपर्ने मागसमेत गरेका छन् ।
अन्याय र अत्याचारको क्रम नरोकिए त्यसको नतिजा सधैँ सकारात्मक मात्र नहुने भन्दै गम्भीर परिस्थिति आउन दिन नहुनेमा उनले जोड दिएका छन् ।
