काठमाडौं । नेपाली कांग्रेसले पार्टीका पूर्वसहमहामन्त्री गोविन्दराज जोशीसहित तीन नेतालाई पार्टीबाट निस्काशन गरेको छ ।
पार्टी अनुशासन उल्लंघन गरेको ठहर गर्दै कांग्रेसले पूर्वसहमहामन्त्री गोविन्दराज जोशी, महासमिति सदस्य पुष्करनाथ ओझा र डडेलधुरा जिल्ला कार्यालय सचिव रामबहादुर विष्टलाई निष्काशन गरेकाे हाे ।
कांग्रेस केन्द्रीय अनुशासन समितिको शनिबार बसेको बैठकले जोशी र ओझालाई ५/५ वर्ष र विष्टलाई ३ वर्ष पार्टीबाट निष्कासन गर्ने निर्णय गरेको हो । अन्तिम स्पष्टीकरण चित्तबुझ्दो नभएको र अनुशासन समितिलाई प्राप्त सबुद प्रमाण अडियो/भिडियो पार्टी विधानविपरीत रहेको भन्दै कारबाही गरिएको शनिबार जारी विज्ञप्तिमा उल्लेख छ ।
जोशी यसअघिको प्रतिनिधिसभा चुनावमा कांग्रेस वरिष्ठ नेता रामचन्द्र पौडेलविरुद्ध तनहुँ-१ मा बागी उम्मेदवार बनेका थिए । यद्यपि भ्रष्टाचारको मुद्दा विचाराधीन रहेकोले उनको उम्मेदवारी खारेज भएको थियो।
ओझाले कांग्रेस सभापति शेरबहादुर देउवा पत्नी आरजु राणालाई चुनाव हराउन भूमिका खेलेको आरोप छ । आरजु कैलालीको निर्वाचन क्षेत्र नम्बर ५ बाट उम्मेदवार बनेकाेमा तत्कालीन एमाले नेता नारदमुनी रानासँग पराजित भएकी थिइन् ।
कार्यालय सचिव विष्टले महिला संघका नेतृहरुलाई घाइते बनाएको आरोप छ । गत असार तेस्रो साता कार्यालय सचिव विष्टको कुटपिटबाट महिला संघकी केही नेतृहरु घाइते पनि भएका थिए ।
