नेकपा अध्यक्ष पुष्पकमल दाहाल ‘प्रचण्ड’ले पूर्वमाओवादी समूहका नेताहरूसँग छुट्टै छलफल गरिरहेका छन् । प्रचण्ड निवास खुमलटारमा जारी छलफलमा पार्टीभित्रको आन्तरिक द्वन्द्वमा पूर्वमाओवादी पक्षधरले लिने पोजिसनको बारेमा छलफल भइरहेको छ । पछिल्लो समय आफ्नै समूहका नेताहरूसँग सशङ्कित हुन थालेपछि प्रचण्डले एकीकृत गर्न छलफल राखेको बताइएको छ ।
यद्यपि, सो छलफलमा गृहमन्त्री रामबहादुर थापा र जनार्दन शर्मा भने सहभागी छैनन् । स्थायी कमिटी सदस्य लेखराज भट्ट पनि गएका छैनन् । आइतबारको बैठकमा पनि थापा उपस्थित थिएनन् । लगातार उनी अनुपस्थित रहेपछि फेरि खेमा परिवर्तन गरेका हुन कि भन्ने पूर्वमाओवादीका नेताहरूले आशङ्का गरेका छन् । यसअघि ओलीनिकट रहेका थापा फेरि पछिल्लो समय प्रचण्डले बोलाएका बैठकमा सहभागी हुँदै आएका थिए । थापा र शर्माले पार्टी एकता जोगाउन प्रधानमन्त्री ओलीसँग सहकार्य गरेर जानुपर्ने मत राख्दै आएका छन् ।
पूर्वमाओवादी समूहकै कतिपय नेताहरूले वरिष्ठ नेता माधव नेपालसँग मिल्नुपर्छ भनेर लबिङ गर्दै आएका छन् । केही नेताहरूले प्रधानमन्त्री केपी शर्मा ओलीसँग सहकार्य गरेर जानुपर्ने बताउँदै आएका छन् । आफ्नै समूहका नेताहरू विभाजित भए पनि प्रचण्डले छलफलमा बोलाएका हुन् । ‘नेताहरूको मत विभाजित भएपछि एकीकृत धारणा बनाउन छुट्टै छलफल गरिएको हो,’ एक स्थायी कमिटी सदस्यले भने ।
