सत्तारुढ दल नेपाल कम्युनिष्ट पार्टी (नेकपा)को शक्तिशाली निकाय स्थायी कमिटी पार्टीभित्रको आन्तरिक विवादको निकास दिन असफल देखिएको छ। स्थायी कमिटी कम्युनिष्ट पार्टीमा प्रमुख राजनीतिक इकाइ मानिन्छ । तर, नेपालको सबैभन्दा ठूलो कम्युनिष्ट पार्टी भने कार्यसम्पादनमा असफल देखिएको छ । 
जसकारण अहिले देखिएको विवादमा ठोस निष्कर्ष दिन नसक्दा पार्टीभित्रको गतिरोध लम्बिएको छ । स्थायी कमिटीमा पार्टीका दोस्रो तहका प्रभावशाली नेताहरुको बाहुल्यता छ । तर, पनि अझै निकास निस्कन सकेको छैन । पार्टीभित्रकै विवादका कारण प्रधानमन्त्री केपी शर्मा ओलीले संसद अधिवेशनसमेत हतारमा अन्त्य गरेका छन् । पार्टीको विवादले सिंगो राष्ट्रिय राजनीतिसहित आमजनताको जनजीवनमा समेत असर गरेको छ । 

बैठक लगातार चारपटक स्थगित

स्थायी कमिटी बैठक सुरु भएको महिना दिन पुग्न लागेको छ। सुरुवाती समयमा केहीदिन बसेको बैठक पछिल्लो समय लगातार स्थगित हुँदै आएको छ  । बैठक फेरि मंगलबारसम्मका लागि सरेको छ । योसमेत गरी लगातार चौथौपटक बैठक सरेको हो । बैठक असार १० गतेबाट सुरु भएको थियो । धारणा राख्ने अधिकांश सदस्यले पार्टी अध्यक्ष तथा प्रधानमन्त्री केपी शर्मा ओली सरकार र पार्टी दुवैमा असफल भएको भन्दै उनको राजीनामा माग गरे । 

आफ्नो राजीनामाको माग जोडदार उठेपछि प्रधानमन्त्री ओलीले बैठक पन्छाउँदै आएका छन् । अर्का अध्यक्ष पुष्पकमल दाहाल प्रचण्ड, वरिष्ठ नेताहरु माधवकुमार नेपाल र झलनाथ खनालसहित नेताहरु ओलीलाई दुवै पदबाट हटाउन लबिङ गरिरहेका छन् । तर, ओलीले आफूले कुनै हालतमा पनि पद नछाड्ने बताउँदै आएका छन् । ओली पनि आफ्नो अडानबाट टसमस नभएपछि प्रचण्ड र नेपाल समूह कम्तिमा दुईमध्ये एक पदबाट हटाउन जोड गरिरहेका छन् ।  जसकारण विवादको गाँठो कस्सिरहेको छ ।

स्थायी कमिटीको बैठकको अनिश्चितता र नेताहरुबीचको किचलोबाट स्थायी कमिटी सदस्यहरु दिक्क छन् । स्थायी कमिटी सदस्य सुरेन्द्र पाण्डेले फेसबुकमै लेखेका छन् ‘लाजै मर्दो भो अब त !’ उनको आशय स्थायी कमिटी असफल भएको संकेततर्फ केन्द्रित छ ।

२४ घण्टा नटिकेको चोचोमोचो
शनिबार दुई अध्यक्षबीचमा मङ्सिरमा अर्ली महाधिवेशन गर्ने सहमति भएको थियो । तर, प्रचण्डनिवास खुमलटारमा वरिष्ठ नेता माधवकुमार नेपाल पक्षसँग बसेको बैठकले त्यसलाई अस्वीकार गर्ने निष्कर्ष निकाल्यो । प्रधानमन्त्री ओलीले शनिबारको सचिवालय बैठकमा अर्ली महाधिवेशन मङ्सिरमा गर्ने प्रस्ताव गरेका थिए । प्रधानमन्त्रीको प्रस्तावलाई प्रचण्डले पनि साथ दिएका खबर सार्वजनिक भएको थियो ।

 
बहुमत सचिवालय सदस्यले प्रधानमन्त्री ओलीलाई दुवै पदबाट हटाउने तयारी गरेपछि उनले ‘अर्ली महाधिवेशन’को प्रस्तावमा पार्टी अध्यक्ष पुष्पकमल दाहाललाई पनि सहमत गराएका थिए । सो खबरसँगै विवादमा ट्विस्ट देखा परेको थियो । तर, २४ घण्टा नबित्दै शनिबारको समझदारी नमान्ने भन्दै प्रचण्ड ओलीलाई भेट्न गएका छन् ।

आइतबार बिहान प्रचण्ड, माधबकुमार नेपाल, झलनाथ खनाल, नारायणकाजी श्रेष्ठ, र केही स्थायी कमिटी सदस्यहरूले छलफल गरेका थिए । सोही छलफलले मंसिरमा महाधिवेशन गर्ने ओलीको प्रस्ताव नमान्ने निष्कर्ष निकालेका हुन् ।