सरकारले संविधानको निशान छापमा रहेको नक्सा परिवर्तनका लागि दर्ता गरेको ‘नेपालको संविधान (दोस्रो संशोधन) विधेयक, २०७७’ राष्ट्रियसभाबाट सर्वसम्मत पारित भएको छ । राष्ट्रियसभामा कुल रहेको ६० जना मध्ये एक जना राष्ट्रिय सभाका अध्यक्ष रहेका छन् । बाँकी ५७ जना सांसदमध्ये, नेपालको संविधान (दोस्रो संशोधन) पारित गरियोस् भन्ने पक्षमा सबै अर्थात् ५७ मत परेको छ । यो सँगै सर्वसम्मत पारित भएको छ ।
यसअघि, उक्त विधेयक प्रतिनिधिसभाबाट पनि सर्वसम्मतले पारित भएको थियो । मतदानमा उपस्थित २ सय ५८ जनाले नै विधेयकको पक्षमा मतदान गरेका थिए । नेपालको भू–भाग लिपुलेक, लिम्पियाधुरा र कालापानी क्षेत्र समावेश भएको चुच्चे नक्सालाई आधिकारिक बनाउन सरकारले संविधान संशोधन प्रस्ताव दर्ता गरेको हो ।
बिहीबारको बैठकमा कानुनमन्त्री शिवमाया तुम्वाहाङ्फेले राष्ट्रियसभाको बैठकमा प्रतिनिधिसभाबाट सन्देश सहित प्राप्त ‘नेपालको संविधान (दोस्रो संशोधन) विधेयक,२०७७ माथि सदनमा छलफल गरियोस् भन्ने प्रस्ताव पेस गरेकी हुन् । यसअघि नै संशोधन र विचार गरियोस् भन्ने प्रस्ताव पेस भइसकेको थियो ।
यसरी सङ्घीय संसद्को दुवै सदनबाट पारित भएको विधेयकलाई प्रतिनिधिसभाका सभामुखले प्रमाणीकरणका लागि राष्ट्रपति कार्यालय पठाउने छन् । प्रमाणीकरण हुँदै राजपत्रमा प्रकाशित भएपछि संविधान संशोधनको औपचारिक प्रक्रिया पूरा हुनेछ ।
यसरी अघि बढ्यो घटनाक्रमः
जेठ ५ : मन्त्रिपरिषद्को बैठकद्वारा कालापानी, लिपुलेक र लिम्पियाधुरा क्षेत्र समेटिएको नयाँ नक्सा पारित ।
जेठ ७ : मन्त्री पद्मा अर्यालद्वारा कालापानी, लिपुलेक र लिम्पियाधुरा क्षेत्र समेटिएको नेपालको अद्यावधिक नक्सा सार्वजनिक ।
जेठ ९ : निशान छाप परिवर्तनका लागि संविधान संशोधन गर्ने मन्त्रिपरिषद्को निर्णय ।
जेठ ९ : सरकारद्वारा संसद सचिवालयमा संविधान संशोधन प्रस्ताव दर्ता ।
जेठ १८ : ‘प्रतिनिधिसभा बैठकमा कानुनमन्त्री डा शिवमाया तुम्वाहाङ्फेद्वारा नेपालको ‘नेपालको संविधान (दोस्रो संशोधन) विधेयक, २०७७’ पेश ।
जेठ १९ : जसपाका दुई सांसद राजेन्द्र श्रेष्ठ र लक्ष्मणलाल कर्णद्वारा संसद सचिवालयमा संविधान संशोधन प्रस्ताव दर्ता ।
जेठ २० : नेपाली कांग्रेसका ८ सांसदद्वारा संविधान संशोधन विधेयक संसद सचिवालयमा दर्ता ।
जेठ २१ : राष्ट्रिय जनमोर्चाकी सांसद दुर्गा पौडेलद्वारा संघीयता खारेजीको प्रस्ताव गरिएको संविधान संशोधनको प्रस्ताव संसद सचिवालयमा दर्ता ।
जेठ २३ : नेपाल मजदुर किसान पार्टीका सांसद प्रेम सुवालद्वारा संविधान संशोधन प्रस्ताव दर्ता । सबैलाई सैनिक तालिमको प्रस्ताव ।
जेठ २७ : ‘नेपालको सविधान दोस्रो संशोधन विधेयकमाथि विचार गरियोस् भन्ने प्रस्ताव सर्वसम्मत रूपमा स्वीकृत। संशोधनका लागि सांसदहरुलाई ७२ घण्टाको समय उपलब्ध ।
जेठ २८ : सांसद सरिता गिरीद्वारा संशोधन प्रस्ताव संसद सचिवालयमा दर्ता ।
जेठ ३१ : संविधान संशोधन विधेयक प्रतिनिधिसभाबाट सर्वसम्मत पारित ।
जेठ ३२ : विधेयक राष्ट्रियसभामा पेश। संशोधनका लागि ७२ घण्टाको समय उपलब्ध ।
असार ४: संविधान संशोधन विधेयक राष्ट्रियसभाबाट सर्वसम्मत पारित ।