काठमाडौं । सीमा विवादमा सरकारले हिजो मंगलबार भारतीय राजदूतसँग गरेको व्यवहारप्रति पूर्वपरराष्ट्रमन्त्री कमल थापाले आपत्ति जनाएका छन् ।
परराष्ट्रमन्त्री प्रदीप ज्ञवालीले मंगलबार भारतीय राजदूत विजय मोहन क्वात्रालाई बोलाएर सीमा अतिक्रमणबारे कूटनीतिक नोट दिएका थिए । त्यसपछि भारतीय राजदूत क्वात्राले त्यसबारे भारतीय विदेश मन्त्रालयले जारी गरेको प्रेस नोट मन्त्री ज्ञवालीलाई दिएका थिए ।
राप्रपा अध्यक्षसमेत रहेका पूर्वउपप्रधान एवं परराष्ट्रमन्त्री थापाले भारतीय राजदूतबाट विज्ञप्ति बुझेकोमा सरकारप्रति असहमति जनाएका हुन् । उनले आज बुधबार सामाजिक सञ्जालमार्फत राजदूतबाट विज्ञप्ति बुझेकोमा आपत्ति जनाएका हुन् ।
परराष्ट्र मन्त्रिले भन्न सक्नु पर्थ्यो- “महामहिम! मैले तपाईलाई आज बोलाएको नेपाली भूमि भारतले अतिक्रमण गरेको वारे बिरोध पत्र बुझाउनको लागि हो। तपाईको मन्त्रालयको बिज्ञप्ति बुझ्न होईन।यो म आज लिन चाहन्न/सक्दिन। तपाईलाई केही दिनु छ भने पछि परराष्ट्र सचिवलाई दिनु भए हुन्छ” https://t.co/rpr5WJiMl5
— Kamal Thapa (@KTnepal) May 13, 2020
पछिल्ला दिनमा अध्यक्ष थापा सरकारको कामकारवाहीप्रति आक्रामक बन्दै गएका छन् । उनले आज बुधबार नै सामाजिक सञ्जालमार्फत कोरोना संक्रमणविरुद्ध सरकारको कामकारवाहीप्रति असन्तुष्टि जनाएका हुन् ।
