आफ्नै कारणले पार्टीभित्र अन्तरविरोध चर्किएसँगै सङ्कटमा परेका नेपाल कम्युनिस्ट पार्टी नेकपा अध्यक्ष तथा प्रधानमन्त्री केपी शर्मा ओली अर्को पक्षसँग समझदारीकाे प्रयास जुटेका छन् ।
पार्टीको शक्तिशाली निकाय स्थायी कमिटी बैठक बोलाउन दबाब दिँदै आएका वरिष्ठ नेता माधवकुमार नेपाल पक्षसँग ओली शक्ति बाँडफाँट गरी समझदारी गर्ने प्रयासमा छन् ।
आफ्नै मनमौजीले राजनीतिक दल विभाजनसम्बन्धी अध्यादेश ल्याएर नैतिक सङ्कट र विवादमा परेका ओलीले स्थायी कमिटी बैठकअघि असन्तुष्ट माधव कुमार पक्षलाई मनाउन साे प्रयास गरेका हुन्।
जसका लागि यतिखेर ओली पक्ष माधवकुमार नेपालसँग पावर सेयरिङकै लागि छलफलमा छ । प्रधानमन्त्री ओलीले नेता नेपालसँग शक्ति बाँडफाँट गरेर नजिकिने अन्तिम प्रयत्न थालेको बुझिएको छ । नेपाल पक्षले तत्कालीन एमालेको नवौँ महाधिवेशनमा निर्वाचित आफ्नो प्यानलको स्थायी कमिटी सदस्य भेला गरेका थिए ।
आफूविरुद्ध पार्टीमा सशक्त रूपमा आवाज उठेपछि ओली पक्ष रक्षात्मक बन्न लागेको हो ।
‘पार्टीभित्र पूर्वएमालेका पंक्ति सबैलाई हातमा नलिई सरकार चलाउन सजिलो नभएको ठहरसहित प्रधानमन्त्रीले नेपाल पक्षसँग निकटता बढाउन लाग्नुभएको छ,’ बालुवाटार स्रोतले भन्यो ।
स्थायी कमिटी बैठक बोलाउनुभन्दा अघि नै एक खालको समझदारी गर्ने तयारीमा दुई पक्ष लागेको बताइएको छ । शक्ति बाँडफाँडलगायत विषयमा समझदारी गर्ने भनिए पनि कुन–कुन विषयमा भन्ने खुलेको छैन ।
दुई पक्षबीच वार्ताका लागि ओली र नोपल पक्षका निकट नेताहरू सहभागी हुँदै छन् । ओली पक्षबाट वार्ताका लागि उपप्रधानमन्त्री ईश्वर पोखरेल, महासचिव विष्णु पौडेल छन् । छलफलकै लागि ५ नम्बर प्रदेशका मुख्यमन्त्री शङ्कर पोखरेल काठमाडौं आएका छन् । ओलीकै समूहमा परराष्ट्र मन्त्री प्रदीप ज्ञवालीसमेत छन् ।
त्यस्तै, नेपाल पक्षबाट वरिष्ठ नेता नेपालसहित नेताहरू भीम रावल, सुरेन्द्र पाण्डे र रघुजी पन्त सहभागी हुँदै छन् । स्थायी कमिटी सदस्यसमेत रहेका रघुजी पन्तले पार्टीका समसामयिक विषयमा छलफलमा आफूहरू जुटेको बताए ।
‘बैठक, छलफल, विचार आदानप्रदान, पार्टीका आन्तरिक जीवनका नियमित प्रक्रिया हुन्, त्यहीअनुसार छलफल भइरहेको छ,’ उनले भने ।
पछिल्लोसमय सरकारको कामकारबाहीप्रति पार्टीभित्र आलोचना र असन्तुष्टि बढ्दै गएपछि ओली पक्ष नेता नेपाल पक्षसँग बाक्लाे छलफलमा छ।
तर, ती छलफलमा शक्ति बाँडफाँडका विषयमा भने कुरा भएकाे थिएन । केही दिनयता ईश्वर पोखरेल, विष्णु पौडेल, शङ्कर पोखरेल, प्रदीप ज्ञवालीलगायत नेताले माधव नेपालसँग छलफलमा गर्दै आएका छन् ।
