काठमाडाैं । प्रधानमन्त्री केपी शर्मा ओलीले कोरोना भाइरसबाट प्रभावितहरुको रोजीरोटीको व्यवस्था गरी देशलाई छिट्टै महामारीबाट उम्काउने बताएका छन् ।
सोमबार नयाँ वर्ष २०७७ को उपलक्ष्यमा शुभकामना सन्देश दिँदै उनले यस्तो बताएका हुन् ।
साथै, उनले अप्ठेरो घडीमा पनि विचलित नहुन आमनागरिकलाई अपिल पनि गरेका छन् ।
अनिकालमा घरभित्रका भाँडाहरु बज्ने बताउँदै त्यसलाई रडाको मच्चिएको ठान्नु भूल ठूलो भूल हुने उनले बताए ।
‘मन आत्तिएको, भत्किएको बेला गर्नेले गरेन कि भन्ने आशंका मनमा पैदा हुन सक्छ, गरेको पुगेन कि भन्ने लाग्न सक्छ,’ उनले शुभकामना सन्देशमा भनेका छन्, ‘अझ छिटो, अझ राम्रो र तत्काल परिणाम आउने गरी काम गरिदिए हुन्थ्यो भन्ने लाग्न सक्छ ।’
साथै, उनले कोरोना भाइरसबाट प्रभावित हुने सबै वर्ग र क्षेत्रका नागरिकहरुको अभिभावकत्व सरकारले लिने बताएका छन् ।
‘सबैभन्दा पहिले जनतालाई महामारीबाट उम्काइनेछ, सँगसँगै रोजीरोटीको जोहो गरिनेछ,’ उनले भने, ‘मुलुक प्रगतिमा रहेको बेला हुने उपलब्धिको न्यायोचित वितरण र अप्ठ्यारोमा हुने क्षतिको सह–भारवहन हामी सबैले नै मिलेर गर्नुपर्दछ ।
आवश्यक पर्दा हुनेको गाँस काटेर नहुनेलाई बचाउने हाम्रो परम्परा पनि हो ।’
उनले कोरोना भाइरसको महामारी अन्त्य नभएसम्म आफ्नो पारिश्रमिक नलिने घोषणासमेत गरेका छन् ।
प्रधानमन्त्रीको हैसियतमा आफूले पाउने पारिश्रमिक कोरोना भाइरसको राहत कोषमा जम्मा गर्ने उनले बताए ।
ओलीले आफ्नो ज्यानलाई जोखिममा राखी उपचारमा संलग्न हुने चिकित्सक तथा स्वास्थ्यकर्मी र नागरिक सुरक्षामा अहोरात्र खट्ने सुरक्षाकर्मीहरुको व्यक्तिगत र व्यावसायिक सुरक्षामा कुनै कमी हुन नदिने बताएका छन् ।
साथै, उनले कोरोकना संक्रमण नियन्त्रणमा फन्टलाइन रहनेहरुको हिफाजत सरकारले हरतरहले गर्ने बताए ।