काठमाडौं । कोरोना भाइरस कोभिड– १९ को संक्रमण फैलिन नदिन सरकारले देशभरि लकडाउन गरेको दोस्रो दिन बुधबार काठमाडौं उपत्यका थप सुनसान बनेको छ ।
लकडाउनको पहिलो दिन काठमाडौंमा फाटफुट सवारी र पैदल यात्रु देखिएका थिए । तर, पहिलो दिनको तुलनामा दोस्रो दिन बुधबार अवज्ञा कम देखिएका छन् ।
बुधबार बिहानै लकडाउन उल्लंघन गर्ने तीन सय दुई सवारीसाधनलाई ट्राफिक प्रहरीले नियन्त्रणमा पनि लिएको छ ।
घरबाट अनावश्यक बाहिर निस्केका सर्वसाधारणलाई सुरक्षाकर्मीले सम्झाइबुझाई गरेर घर फर्काइरहेका प्रहरी प्रवक्ता शैलेस थापा क्षेत्रीले जानकारी दिए ।
अत्यावश्यक सेवा र लकडाउनमा चलाउने अनुमति लिएका सवारी भने सडकमा फाटफुट गुडेका छन् ।